Paliwanag sa Bid-Ask Spread at Slippage
Table of Contents
Panimula
Ano ang bid-ask spread?
Mga market maker at bid-ask spread
Mga chart ng lalim at bid-ask spread
Porsyento ng bid-ask spread
Ano ang slippage?
Positibong slippage
Slippage tolerance‍
Mga pangwakas na pananaw
Paliwanag sa Bid-Ask Spread at Slippage
HomeArticles
Paliwanag sa Bid-Ask Spread at Slippage

Paliwanag sa Bid-Ask Spread at Slippage

Baguhan
Published Jun 10, 2021Updated Sep 13, 2021
7m

TL;DR 

Ang bid-ask spread ay ang pagkakaiba sa pagitan ng pinakamababang presyong hiniling para sa isang asset at ang bid na may pinakamataas na presyo. May mas maliit na spread ang mga liquid asset na tulad ng Bitcoin kaysa sa mga asset na may mas mababang liquidity at dami ng pag-trade.

Nangyayari ang slippage kapag nag-settle ang isang trade sa isang average na presyo na iba sa unang hiniling. Madalas itong nangyayari kapag nagpapatupad ng mga market order. Kung walang sapat na liquidity para kumpletuhin ang iyong order o volatile ang merkado, puwedeng magbago ang pangwakas na order price. Para labanan ang slippage gamit ang mga asset na may mababang liquidity, puwede mong subukang hatiin ang iyong order sa mas maliliit na bahagi.


Panimula

Kapag bumili at nagbenta ka ng mga asset sa isang palitan ng cyrpto, direktang nauugnay ang mga market price sa supply at demand. Bukod sa presyo, kasama sa iba pang mahahalagang salik na dapat isaalang-alang ang dami ng pag-trade, liquidity ng merkado, at mga uri ng order. Depende sa mga kondisyon sa merkado at sa mga uri ng order na gagamitin mo, hindi mo laging makukuha ang presyong gusto mo para sa isang trade.

Tuloy-tuloy ang negosasyon ng mga mamimili at nagbebenta na bumubuo ng spread sa pagitan ng dalawang panig (bid-ask spread). Depende sa halaga ng asset na gusto mong i-trade at sa volatility nito, puwede ka ring makaranas ng slippage (idedetalye pa mamaya). Para maiwasang magulat, kapaki-pakinabang ang pagkakaroon ng ilang pangunahing kaalaman tungkol sa order book ng palitan.


Ano ang bid-ask spread?

Ang bid-ask spread ay ang pagkakaiba sa pagitan ng pinakamataas na bid price at pinakamababang ask price ng isang order book. Sa mga tradisyonal na merkado, ang spread ay madalas na ginagawa ng mga market maker o broker liquidity provider. Sa mga crypto market, ang spread ay resulta ng pagkakaiba sa pagitan ng mga limit order mula sa mga mamimili at nagbebenta.
Kung gusto mong makabili kaagad sa market price, kailangan mong tanggapin ang pinakamababang ask price mula sa isang nagbebenta. Kung gusto mong makabenta kaagad, kukunin mo ang pinakamataas na bid price mula sa isang mamimili. Mas maliit ang bid-ask spread ng mga mas liquid na asset (tulad ng forex), ibig sabihin, maipapatupad ng mga mamimili at nagbebenta ang kanilang mga order nang hindi gumagawa ng malalaking pagbabago sa presyo ng isang asset. Dahil ito sa maraming order sa order book. Kapag mas malawak ang bid-ask spread, magkakaroon ng mas malaking pagbabago-bago sa presyo kapag nagsasara ng maraming order.


Mga market maker at bid-ask spread

Mahalaga ang konsepto ng liquidity sa mga pampinansyal na merkado. Kung susubukan mong mag-trade sa mga merkadong may mababang liquidity, baka maghintay ka nang ilang oras o kahit mga araw hanggang sa may isa pang trader na tumugma sa iyong order.

Mahalaga ang paggawa ng liquidity, pero hindi lahat ng merkado ay may sapat na liquidity mula lang sa mga indibidwal na trader. Halimbawa, sa mga tradisyonal na merkado, nagbibigay ang mga broker at market maker ng liquidity kapalit ng mga kita sa arbitrage.

Puwedeng samantalahin ng isang market maker ang isang bid-ask spread sa pamamagitan lang ng pagbili at pagbebenta ng asset nang sabay. Sa pamamagitan ng pagbebenta sa pinakamataas na ask price at pagbili sa pinakamababang bid price nang paulit-ulit, puwedeng kunin ng mga market maker ang spread bilang kita sa arbitrage. Kahit ang maliit na spread ay puwedeng magbigay ng malaking kita kung makakapag-trade nang marami nito sa buong araw. Mas maliit ang spread ng mga asset na may mataas na demand dahil nakikipagkumpitensya ang mga market maker at pinapaliit nila ang spread.

Halimbawa, puwedeng mag-alok ang isang market maker na bumili ng BNB sa halagang $350 bawat coin, kasabay nito ay magbenta ng BNB sa halagang $351, na bumubuo ng $1 na spread. Kailangang matugunan ng sinumang gustong mag-trade kaagad sa merkado ang kanilang mga posisyon. Ngayon, ang spread ay puro kita na lang sa arbitrage ng market maker na nagbebenta ng binibili niya at bumibili ng ibebenta niya.


Mga chart ng lalim at bid-ask spread

Tingnan natin ang ilan sa mga halimbawa ng cryptocurrency sa totoong mundo at ang kaugnayan ng dami, liquidity, at bid-ask spread. Sa UI ng palitan ng Binance, madali mong makikita ang bid-ask spread sa pamamagitan ng paglipat sa view ng chart ng [Lalim]. Nasa kanang sulok sa itaas ng bahagi ng chart ang button na ito.


Nagpapakita ang opsyong [Lalim] ng graphical na representasyon ng order book ng isang asset. Makikita mo ang dami at presyo ng mga bid sa berde, kasama ng dami at presyo ng mga ask sa pula. Ang pagitan ng dalawang bahaging ito ay ang bid-ask spread, na makakalkula mo sa pamamagitan ng pagbawas ng berdeng bid price mula sa pulang ask price.


Gaya ng nabanggit namin kanina, may ipinapahiwatig na kaugnayan ang liquidity at ang mas maliliit na bid-ask spread. Ang dami ng pag-trade ay isang karaniwang ginagamit na indicator ng liquidity, kaya inaasahan naming makakita ng mas maraming pag-trade na may mas maliliit na bid-ask spread bilang porsyento ng presyo ng isang asset. Mas malaki ang kumpetisyon ng mga trader na gustong samantalahin ang bid-ask spread sa mga cryptocurrency, stock, at iba pang asset na palaging ginagamit sa pakikipag-trade.


Porsyento ng bid-ask spread

Para ikumpara ang bid-ask spread ng iba't ibang cryptocurrency o asset, dapat natin itong suriin ayon sa porsyento. Simple lang ang kalkulasyon:

(Ask Price - Bid Price)/Ask Price x 100 = Porsyento ng Bid-Ask Spread

Kunin nating halimbawa ang BIFI. Noong isinusulat ito, may ask price ang BIFI na $907 at bid price na $901. Nagbibigay sa atin ang pagkakaibang ito ng bid-ask spread na $6. Kung hahatiin ang $6 sa $907, pagkatapos ay imu-multiply sa 100, magkakaroon tayo ng pinal na porsyento ng bid-ask spread na humigit-kumulang 0.66%.


Ipagpalagay ngayon na may bid-ask spread na $3 ang Bitcoin. Bagama't kalahati ito ng nakita natin sa BIFI, kapag ikinumpara natin ang mga ito ayon sa porsyento, 0.0083% lang ang bid-ask spread ng Bitcoin. Kapansin-pansin ding mas mababa ang dami ng pag-trade sa BIFI, na sumusuporta sa palagay nating madalas na mas malaki ang mga bid-ask spread ng mga asset na hindi gaanong liquid.

Makakabuo tayo ng ilang konklusyon sa mas maliit na spread ng Bitcoin. Kapag mas maliit ang porsyento ng bid-ask spread ng isang asset, malamang na mas liquid ito. Kung gusto mong magpatupad ng malalaking market order, madalas na mas maliit ang panganib sa pagbabayad ng presyo na hindi mo inaasahan.


Ano ang slippage?

Ang slippage ay isang karaniwang pangyayari sa mga merkadong may mataas na volatility o mababang liquidity. Nangyayari ang slippage kapag nag-settle ang isang trade sa presyong iba sa inaasahan o hiniling. 

Halimbawa, ipagpalagay na gusto mong maglagay ng malaking buy order sa merkado sa halagang $100, pero walang kinakailangang liquidity ang merkado para punan ang iyong order sa presyong iyon. Bilang resulta, kakailanganin mong kunin ang mga sumusunod na order (mas mataas sa $100) hanggang sa ganap na mapuno ang iyong order. Dahil dito, magiging mas mataas sa $100 ang average na presyo ng iyong pagbili, at tinatawag natin itong slippage.

Ibig sabihin, kapag gumawa ka ng market order, awtomatikong itutugma ng palitan ang iyong pagbili o pagbebenta para limitahan ang mga order sa order book. Itutugma ka ng order book sa pinakamababang presyo, pero magsisimula kang tumaas sa chain ng order kung hindi sapat ang dami para sa gusto mong presyo. Dahil sa prosesong ito, pupunan ng merkado ang iyong order sa mga hindi inaasahan at magkakaibang presyo.

Sa crypto, ang slippage ay isang karaniwang pangyayari sa mga automated market maker at decentralized exchange. Ang slippage ay posibleng maging mahigit sa 10% ng inaasahang presyo para sa mga altcoin na volatile o mababa ang liquidity.


Positibong slippage

Ang slippage ay hindi naman nangangahulugang makukuha mo ang presyong mas mababa kaysa sa inaasahan. Puwedeng mangyari ang positibong slippage kung bumababa ang presyo habang ginagawa mo ang iyong buy order o tumataas ang presyo kung gumagawa ka ng sell order. Kahit na hindi karaniwan, puwedeng mangyari ang positibong slippage sa ilang merkado na mataas ang volatility.


Slippage tolerance‍

Nagbibigay-daan sa iyo ang ilang palitan na manu-manong magtakda ng antas ng slippage tolerance‍ para limitahan ang anumang slippage na puwede mong maranasan. Makikita mo ang opsyong ito sa mga automated market maker tulad ng PancakeSwap sa Binance Smart Chain at Uniswap ng Ethereum.


Ang halaga ng slippage na itatakda mo ay puwedeng magkaroon ng epekto sa tagal ng pag-clear sa order mo. Kung itatakda mo sa mababa ang slippage, puwedeng tumagal bago mapunan ang iyong order o hindi na talaga ito mapunan. Kung itatakda mo ito nang masyadong mataas, baka makita ng isa pang trader o bot ang nakabinbin mong order at i-front run ka. 

Sa ganitong sitwasyon, nangyayari ang front-running kapag may isa pang trader na nagtakda ng mas mataas na bayad sa gas kaysa sa iyo para siya ang unang makabili sa asset. Pagkatapos, maglalagay ang front runner ng isa pang trade para ibenta ito sa iyo sa pinakamataas na presyong handa mong bayaran batay sa iyong slippage tolerance.


Pagbabawas sa negatibong slippage

Bagama't hindi mo laging maiiwasan ang slippage, may ilang diskarte na puwede mong magamit para subukang bawasan ito.

1. Sa halip na gumawa ng malaking order, subukang hatiin ito sa mas maliliit na block. Bantayang maigi ang order book para ikalat ang iyong mga order, at tiyaking hindi ka naglalagay ng mga order na mas malaki kaysa sa available na dami.

2. Kung gumagamit ka ng decentralized exchange, huwag kalimutang isama sa kalkulasyon ang bayarin sa transaksyon. Malaki ang bayarin sa ilang network depende sa trapiko ng blockchain na puwedeng umubos sa anumang kinita mo, habang iniiwasan ang slippage.

3. Kung mababa ang liquidity ng mga asset na pinapangasiwaan mo, tulad ng maliit na liquidity pool, puwedeng lubhang maapektuhan ng iyong aktibidad sa pag-trade ang presyo ng asset. Puwedeng makaranas ang isang transaksyon ng maliit na halaga ng slippage, pero maaapektuhan ng maraming mas maliliit na slippage ang presyo ng susunod na block ng mga transaksyong gagawin mo.
4. Gumamit ng mga limit order. Tinitiyak ng mga order na ito na nakukuha mo ang presyong gusto mo o ang mas magandang presyo kapag nagte-trade. Bagama't isinasakripisyo mo ang bilis ng isang market order, makakasigurado kang hindi ka makakaranas ng anumang negatibong slippage.


Mga pangwakas na pananaw

Kapag nagte-trade ka ng cryptocurrency, huwag kalimutan na puwedeng baguhin ng bid-ask spread o slippage ang pinal na presyo ng iyong mga trade. Hindi mo palaging maiiwasan ang mga iyon, pero mahalagang isaalaang-alang ang mga iyon sa mga desisyon mo. Para sa mas maliliit na trade, puwedeng maliit lang ito, pero tandaan na sa maraming order, ang average na presyo bawat unit ay posibleng mas mataas kaysa sa inaasahan.

Para sa sinumang nag-eeksperimento sa decentralized finance, ang pag-unawa sa slippage ay isang mahalagang bahagi ng mga pangunahing kaalaman sa pag-trade. Kung wala kang pangunahing kaalaman, malaki ang panganib na mawawalan ka ng pera dahil sa front-running o labis na slippage.