კრიპტო ETF-ები

კრიპტო ETF-ები

კრიპტოვალუტის საბირჟო საინვესტიციო ფონდი (ETF) წარმოადგენს საინვესტიციო ფონდის ტიპს, რომელიც მიბმულია ერთი კრიპტოვალუტის ან კრიპტო კალათის ფასების მოძრაობაზე. ტრადიციული ETF-ების მსგავსად, კრიპტო ETF-ებით ვაჭრობა ხორციელდება ბირჟებზე და წარმოადგენს კრიპტო ბაზარზე ფასების მოძრაობით მოგების მიღების მოხერხებულ გზას უშუალოდ კრიპტოვალუტის ფლობის საჭიროების გარეშე.

განსხვავება აქციების ETF-ებსა და კრიპტო ETF-ებს შორის

როგორც ტრადიციული აქციების ETF-ები, ასევე კრიპტო ETF-ები მიბმულია საბაზისო აქტივების ფასების მოძრაობაზე. აქციების ETF-ები მიბმულია კომპანიების აქციების კალათის ფასების მოძრაობაზე, ხოლო კრიპტო ETF-ები - სხვადასხვა კრიპტოვალუტის ფასებზე. 

ორივე ტიპის ETF-ებით ვაჭრობა ხორციელდება სავაჭრო ბირჟებზე და ინვესტორებს სთავაზობს კრიპტო ბაზარზე ფასების მოძრაობით მოგების მიღების მოხერხებულ გზას უშუალოდ კრიპტოვალუტის ფლობის საჭიროების გარეშე.

ამ ორ ტიპს შორის მსგავსების გარდა, არსებობს განსხვავებებიც. კრიპტო ETF-ების საბაზისო აქტივებს წარმოადგენს ციფრული ვალუტები, რაც ტრადიციულ აქციებთან შედარებით გაცილებით არასტაბილური და კომპლექსურია. ისინი დაკავშირებულია უნიკალურ რისკ ფაქტორებთან. გარდა ამისა, კრიპტო ETF-ებთან დაკავშირებული რეგულაციები გაცილებით ნაკლებია. ბევრი ქვეყნის მარეგულირებელი ორგანოები ჯერ კიდევ მუშაობენ აქტივების ამ ახალ კლასთან დაკავშირებული წესების შემუშავებაზე. 

უფრო მეტიც, ტრადიციული აქციებისგან განსხვავებით, ციფრული აქტივების გამოყენება და შენახვა უნიკალურ ტექნიკურ საშუალებებს მოითხოვს. პოტენციური კიბერშეტევებისგან დასაცავად, კრიპტო ETF-ების ოპერატორებს ესაჭიროებათ მონაცემთა უსაფრთხოდ შენახვისთვის საჭირო მოწყობილობები, მაგალითად „ცივი შენახვის“ აპარატურა.

განსხვავება ფიზიკური უზრუნველყოფის მქონე კრიპტო ETF-ებსა და სინთეზურ კრიპტო ETF-ებს შორის 

არსებობს კრიპტოვალუტის ETF-ების ორი ძირითადი ტიპი.

პირველი ტიპია ფიზიკური უზრუნველყოფის მქონე კრიპტო ETF-ები, რომელთაც ასევე სპოტ ETF-ებს უწოდებენ. საინვესტიციო ფირმა, რომელიც მართავს ETF-ის შესყიდვის პროცესებს და თავად ფლობს კრიპტოვალუტას. როდესაც ინვესტორები ყიდულობენ ამ ETF-ებს, ისინი ამ საბაზისო კრიპტოვალუტების არაპირდაპირი მფლობელები ხდებიან, რაც მათ აძლევს შესაძლებლობას მიიღონ მოგება ამ მონეტების ფასის ცვლილებებით, მათი უშუალოდ შეძენის ან განკარგვის საჭიროების გარეშე. 

პირველი სპოტ Bitcoin ETF გამოშვებული იქნა 2023 წლის 15 აგვისტოს, ევროპაში. გარდა ამისა, უამრავი სპოტ Bitcoin ETF ელოდება ნებართვის მიღების პროცესის დასრულებას.

ფიზიკური უზრუნველყოფის მქონე კრიპტო ETF-ებს რამდენიმე დადებითი და უარყოფითი მხარე გააჩნია:

დადებითი მხარეები:

1. კრიპტოვალუტის ფასებთან დაკავშირების სიმარტივე

2. ფინანსურ რეგულაციებთან შესაბამისობა 

3. ETF-ის ოპერატორი პასუხისმგებელია საბაზისო კრიპტოს უსაფრთხოებაზე, შენახვაზე და კონტროლზე

უარყოფითი მხარეები:

1. მართვის საკომისიოები  შეიძლება გამოიწვიოს მთლიანი მოგების ოდენობის შემცირება

2. მართვის ფონდის მიერ ფასების კონტროლისას დაშვებული პოტენციური შეცდომები

3. ფიზიკური უზრუნველყოფის მქონე კრიპტო ETF-ებისთვის კრიპტოვალუტების შეზღუდული არჩევანი

მეორე ტიპი ცნობილია სინთეზური კრიპტო ETF-ის სახელწოდებით. ისინი მიბმულია კრიპტოვალუტის დერივატივ-პროდუქტების ფასებზე, როგორებიცაა კრიპტო ფიუჩერსები და ბირჟაზე სავაჭრო პროდუქტები (ETP-ები). მაგალითად, სინთეზური კრიპტო ETF-ის ერთ-ერთი ტიპია Bitcoin-ის ფიუჩერსების ETF. 

სინთეზური ETF-ების შემთხვევაში, მათი აქციების ფასი იცვლება დერივატივ-ინსტრუმენტის ფასის და არა უშუალოდ კრიპტოვალუტის ღირებულების ცვლილების პარალელურად. მიუხედავად ამისა, ანგარიშსწორების თარიღის მიახლოებასთან ერთად, მისი ფასი სპოტ ფასს მიუახლოვდება. 

ამ ETF-ებით ვაჭრობა დაკავშირებულია დამატებით რისკებთან, რადგან ისინი დამოკიდებულია დერივატივებზე და პოტენციურად დაბალია მათი ოპერაციების გამჭვირვალობა. 

რა უპირატესობები აქვს ETF-ებს?

კრიპტო ETF-ებს რამდენიმე უპირატესობა გააჩნია, რამაც შეიძლება ამ კრიპტოვალუტის ბაზრის მიმართ ინვესტორების ინტერესი გაზარდოს. 

პირველ რიგში, ისინი გვთავაზობს მრავალ ციფრულ აქტივთან წვდომის მოსახერხებელ მეთოდს, ინდივიდუალური კრიპტოვალუტების უშუალოდ ყიდვისთვის და მართვისთვის აუცილებელი ტექნიკური საშუალებების საჭიროების გარეშე. 

მეორე, ETF-ები ინტეგრირებულია სტანდარტულ ფინანსურ სტრუქტურაში, რაც ინვესტორებს საშუალებას აძლევს მოახდინონ საკუთარი პორტფოლიოების დივერსიფიკაცია ნაცნობი პლატფორმების, მაგალითად საპენსიო გეგმების ან ინდივიდუალური საბროკერო ანგარიშების გამოყენებით.  

და ბოლოს, კრიპტო ETF-ებით ვაჭრობის დროს, არ არის საჭირო გაგაჩნდეთ ცოდნა კრიპტოვალუტაში ინვესტირების შესახებ, რადგან ამ დროს ვაჭრობას თქვენს ნაცვლად ანალიტიკოსები ახორციელებენ. არ არის საჭირო კრიპტოვალუტასთან და ბლოკჩეინთან დაკავშირებული ჟარგონის და ტექნიკური დეტალების შესწავლა. ის ინვესტორებს საშუალებას აძლევს მიიღონ პოტენციური მოგება ვაჭრობასთან დაკავშირებული სირთულეების გვერდის ავლით.