Paano Bumuo ng Isang Well-Balanced na Portfolio ng Crypto

TL;DR

Ang pagbabalanse ng portfolio ng crypto ay hindi naiiba sa pagbabalanse ng isang tradisyonal na portfolio. Madali mong mapapababa ang pangkalahatan mong panganib ayon sa iyong profile at diskarte sa pamumuhunan. Ang kailangan mo lang gawin para magsimula ay ang pag-diversify sa mga puhunan mo sa iba't ibang cryptocurrency.

Kuwestiyonable kung hanggang saan ka puwedeng mag-diversify, dahil may mga positibo at negatibong epekto ang parehong panig. Gayunpaman, pangkalahatang tinatanggap na kapaki-pakinabang kung may pag-diversify kang gagawin kahit papaano. Mapapababa mo ang panganib sa iyong mga pamumuhunan sa pamamagitan ng paghawak ng iba't ibang crypto asset (kabilang ang mga stablecoin) at pagtiyak na regular mong ire-rebalance ang iyong asset.

Para mas padaliin ang pamamahala sa iyong portfolio, puwede kang gumamit ng third-party na tracker ng portfolio o puwede mong manu-manong itala ang iyong mga transaksyon sa isang spreadsheet. Puwedeng i-link sa iyong mga personal na wallet at palitan ng cryptocurrency ang ilang tracker, na mas nagpapadali sa proseso.

Panimula

Madali lang magsimula sa pamumuhunan sa crypto sa pamamagitan ng pagbili ng una mong bitcoin (BTC), ether (ETH), o anumang iba pang cryptocurrency. Bagama't may ilang mamumuhunan na mas gustong bumili at humawak ng pinakamalalaking cryptocurrency, mas gusto ng iba na mag-eksperimento sa mga altcoin. Pero ano nga ba ang pinakamagandang gawin? Mas malamang na magiging matagumpay ka sa pamamagitan ng pag-iisip nang mabuti tungkol sa alokasyon ng asset mo at regular na pagbabalanse sa portfolio ng crypto mo. Depende sa panganib na kaya mo, may ilang paraan para gawin ito. Hindi mahirap balansehin ang iyong portfolio, at talagang makikinabang ka sa mga resulta.

Ano ang portfolio ng crypto?

Ang portfolio ng crypto ay isang koleksyon ng mga cryptocurrency na pagmamay-ari ng isang mamumuhunan o trader. Karaniwang naglalaman ang mga portfolio ng iba't ibang asset, kabilang ang mga altcoin at pinansyal na produkto ng crypto. Medyo katulad ito ng tradisyonal na portfolio sa pamumuhunan, maliban na lang sa pananatili mo sa iisang klase ng asset. Puwede mong manu-manong subaybayan ang portfolio ng crypto mo gamit ang isang spreadsheet o puwede kang gumamit ng mga espesyal na tool at software para kalkulahin ang iyong mga hinahawakan at kita. Malaki ang maitutulong ng isang magandang tracker ng portfolio. Mahalaga ang mga tracker sa mga day trader at iba pang short-term trader, pero kapaki-pakinabang din ito sa mga pangmatagalang mamumuhunan at sa mga HODLer.

Ano ang alokasyon ng asset at pag-diversify?

Kapag gumagawa ng portfolio ng pamumuhunan, pamilyar ka dapat sa mga konsepto ng alokasyon ng asset at pag-diversify. Ang alokasyon ng asset ay ang pamumuhunan sa iba't ibang klase ng asset (hal., mga cryptocurrency, stock, bond, precious metal, pera, atbp.). Ang pag-diversify ay nauugnay sa distribusyon ng iyong mga pondo sa pamumuhunan sa iba't ibang asset o sektor. Halimbawa, puwede mong i-diversify ang mga hinahawakan mong stock sa pamamagitan ng pamumuhunan sa iba't ibang industriya, gaya ng agrikultura, teknolohiya, enerhiya, at pangangalagang pangkalusugan. Nababawasan ng dalawang diskarteng ito ang pangkalahatan mong panganib.

Teknikal na iisang klase lang ng asset ang mga cryptocurrency. Pero sa isang portfolio ng cryptocurrency, puwede kang mag-diversify sa maraming produkto, coin, at token na nag-aalok ng iba't ibang layunin at paggagamitan. Halimbawa, puwedeng 40% bitcoin, 30% stablecoin, 15% NFT, at 15% altcoin ang alokasyon mo sa iyong portfolio. Para alamin pa ang paksa, basahin ang Pagpapaliwanag sa Alokasyon ng Asset at Pag-diversify.

Mga nakatuon vs. na-diversify na portfolio ng crypto

Ang karamihan sa mga payong maririnig mo ay dapat mong i-diversify ang portfolio ng crypto mo. Bagama't karaniwan na ito para sa mga mamumuhunan, may mga positibo at negatibong epekto ang paglalagay ng iyong kapital sa iba't ibang asset. Gaya ng nabanggit na natin, pinapababa ng na-diversify na portfolio ang pangkalahatang panganib at volatility. Puwedeng mabawi ng mga kita ang mga pagkalugi, at puwede nitong mapanatiling stable ang iyong posisyon. Mas marami ring oportunidad ang iyong portfolio na kumita sa bawat coin na pag-aari mo. Hindi palaging mananalo ang bawat pamumuhunan, pero sa tamang alokasyon ng asset at pag-diversify, mas malamang kang kumita sa paglipas ng panahon.

Gayunpaman, kapag mas na-diversify ang iyong portfolio, mas masasalamin nito ang pangkalahatang merkado. Gusto ng karamihan sa mga trader at mamumuhunan na higitan ang merkado sa pamamagitan ng mas malalaking kita. Ang isang mas na-diversify na portfolio ay magreresulta sa mga mas katamtamang return kumpara sa isang matagumpay na nakatuong portfolio. Mababalanse ng mahihinang asset ang malalakas kumita.

Nangangailangan din ng higit na oras at pananaliksik ang pamamahala ng isang mas na-diversify na portfolio. Para maging mahusay sa pamumuhunan, nauunawaan mo dapat kung ano ang binibili mo. Kapag malaki ang portfolio, mas lumiliit ang tsansang mauunawaan ang lahat. Kung nasa iba't ibang blockchain ang iyong portfolio, posibleng kailangan mo ng iba't ibang wallet at palitan para ma-access ang iyong mga asset. Ikaw ang magpapasya kung magda-diversify o hindi, pero palaging inirerekomenda na mag-diversify kahit papaano.

Iba't ibang uri ng mga cryptocurrency

Bitcoin ang pinakasikat na cryptocurrency at ang pinakamalaki ayon sa market cap. Pero kasama sa isang mahusay na nabalanseng portfolio ang iba't ibang coin para mabawasan ang pangkalahatang panganib. Tingnan natin ang ilan sa mga ito.

Mga coin sa pagbabayad

Sa kasalukuyan, mahirap humanap ng mga bagong coin na mga pagbabayad ang pangunahing pagtuon. Pero kung babalikan mo ang simula ng mga cryptocurrency, ang karamihan sa mga proyekto ay mga system para maglipat ng value. Bitcoin ang pinakasikat na halimbawa, bagama't mayroon din tayong Ripple (XRP), Bitcoin Cash (BCH), at Litecoin (LTC), bukod sa iba pa. Ang mga coin na ito ang unang henerasyon ng mga cryptocurrency bago naging available ang Ethereum at bago maipakilala ang mga smart contract.

Mga Stablecoin

Sinusubukan ng stablecoin na gayahin ang isang pinagbabatayang asset gaya ng fiat currency o precious metal. Halimbawa, nakabatay ang BUSD sa U.S. dollar na may mga reserbang nakatakda sa 1:1 na ratio. Gumagamit ang PAX Gold (PAXG) ng parehong system, pero ibinabatay nito ang coin sa presyo ng isang fine troy ounce ng gold na nasa mga reserba. Bagama't hindi nangangahulugang makakapagbigay ang mga stablecoin ng malalaking kita, pinapangatawanan ng mga ito ang pagiging stablecoin at nagbibigay ang mga ito ng stability.

Volatile ang merkado ng cryptocurrency, kaya magandang magkaroon ng isang bagay sa iyong portfolio na pinapanatiling kapaki-pakinabang ang value nito. Kung nakabatay ang stablecoin sa isang bagay na nasa labas ng ecosystem ng crypto, hindi ito maaapektuhan ng pagbaba sa merkado ng crypto. Kung gusto mong maglabas ng mga token mula sa isang coin o proyekto, mabilis mong maililipat ang mga iyon sa isang stablecoin na nakabatay sa dolyar gaya ng BUSD para maprotektahan ang mga kita mo. Mas mahabang proseso ang pag-convert sa fiat kumpara sa pag-trade para sa isang stablecoin.

Mga Security token

Gaya ng mga tradisyonal na security, puwedeng kumatawan ang isang security token ng maraming bagay. Puwede itong equity sa isang kumpanya, isang bond na inisyu ng proyekto, o maging mga karapatan sa pagboto. Epektibong na-digitize at nailagay sa blockchain ang mga security, ibig sabihin, karamihan sa mga ito ay napapailalim sa parehong mga regulasyon. Dahil dito, ang mga security token ay nasa hurisdiksyon ng mga lokal na regulator at dapat sumailalim sa isang legal na proseso bago maisyu.

Mga Utility token

Ang utility token ay nagsisilbing susi sa isang serbisyo o produkto. Halimbawa, parehong utility token ang BNB at ETH. Bukod sa maraming bagay, magagamit mo ang mga ito para makapagbayad ng bayarin sa transaksyon kapag gumagamit ng mga decentralized application (DApp). Maraming proyekto ang nag-iisyu ng sarili nilang utility token para mangalap ng mga pondo sa isang coin offering. Sa teorya, may direktang ugnayan dapat ang value ng token sa value ng utility nito.

Mga token ng pamamahala

Sa pamamagitan ng paghawak sa isang token ng pamamahala, makakatanggap ka ng karapatang bumoto sa isang proyekto at puwede ka pa ngang magkaroon ng bahagi sa kita. Malamang ay makikita mo ang mga token na ito sa mga platform ng decentralized finance (DeFi) gaya ng PancakeSwap, Uniswap, o SushiSwap. Gaya ng mga utility token, ang value ng token ng pamamahala ay direktang nauugnay sa tagumpay ng pinagbabatayang proyekto.

Mga pinansyal na crypto na produkto

Ang pagkakaroon ng portfolio ay hindi lang tungkol sa paghawak ng iba't ibang coin. Makakatulong din ang mga pinansyal na crypto na produkto na mas ma-diversify pa ang iyong portfolio. Ipagpalagay mo ito na parang pamumuhunan sa mga bond ng pamahalaan, ETF, o mutual fund sa halip na paghawak lang ng mga share. Napakaraming produkto kung saan ka puwedeng mamuhunan sa iba't ibang blockchain at DApp.

Kung bago sa iyo ang paksang ito, nag-aalok ang Binance ng iba't ibang pinansyal na produkto. Para tingnan ito, mag-log in sa iyong account sa Binance at mag-navigate papunta sa seksyong [Pananalapi]. May iba't ibang antas ng panganib ang lahat ng produktong ito, kaya tiyaking nauunawaan mo kung paano gumagana ang mga ito bago ka tumaya.

Paano bumuo ng isang portfolio ng crypto na mahusay na nabalanse

May kanya-kanyang ideya ang bawat mamumuhunan o trader kung ano para sa kanila ang isang portfolio ng crypto na mahusay na nabalanse. Pero may ilang pangkalahatang panuntunang dapat ikonsidera:

1. Paghiwa-hiwalayin ang iyong portfolio sa mga pamumuhunang may mataas, katamtaman, at mababang panganib, at bigyan ng naaangkop na bigat ang mga ito. Siguradong hindi balanse ang isang portfolio na naglalaman ng maraming pamumuhunang mataas ang panganib. Puwede ka nitong bigyan ng tsansang magkaroon ng mas malalaking kita, pero puwede rin itong magdulot ng malalaking pagkalugi. Nakadepende sa iyong profile sa panganib kung ano ang pinakamainam para sa iyo, pero magkahalo dapat ang mga ito.

2. Ikonsidera ang paghawak sa ilang stablecoin para makatulong sa pagbibigay ng liquidity para sa iyong portfolio. Ang mga stablecoin ang susi sa maraming DeFi platform at makakatulong ito sa iyo na makapag-lock in ng mga kita o makalabas ng posisyon sa mabilis at madaling paraan.

3. I-rebalance ang iyong portfolio kung kailangan. Napaka-volatile ng merkado ng crypto, at nababago dapat ang mga desisyon mo depende sa kasalukuyang sitwasyon.

4. Ilaan sa madiskarteng paraan ang bagong kapital para maiwasang mapabigat ang isang bahagi ng iyong portfolio. Kung kumita ka nang malaki kamakailan mula sa isang coin, posibleng nakakaengganyong magkarga pa ng pera. Huwag hayaan ang sarili na maging gahaman, at isipin kung saan mo mas magandang mailalagay ang pera.

5. Magsagawa ng sariling pananaliksik. Wala talagang tatalo sa classic na payong ito. Sarili mong pera ang ipinupuhunan mo, kaya huwag lang umasa sa payo ng iba. Para sa mga tip sa pagtukoy sa mga potensyal na scam, basahin ang 5 Karaniwang Scam sa Cryptocurrency at Paano Iwasan ang Mga Ito.

6. Ipuhunan lang ang kaya mong mawala. Wala sa tamang balanse ang portfolio mo kung nase-stress ka dahil dito. Hindi dapat magdulot ng malulubhang kahihinatnan ang iyong mga posisyon kung hindi magiging maganda ang resulta ng mga ito.

Mga tracker ng portfolio ng crypto

Ang tracker ng portfolio ay isang programa o serbisyong nagbibigay-daan sa iyong subaybayan ang mga paggalaw ng mga hinahawakan mo. Makikita mo kung ano ang lagay ng kasalukuyan mong alokasyon kung ikukumpara sa iyong mga pangmatagalang layunin at susubaybayan nito ang iyong pag-usad. Narito ang ilang halimbawang puwede mong ikonsidera:

CoinMarketCap

Ang CoinMarketCap ay isang napakasikat na tracker ng presyo na nag-develop ng sarili nitong feature sa portfolio. Available ang tracker ng portfolio nang libre sa mga desktop at mobile device. Para magamit ang tracker ng portfolio, dapat mong idagdag nang manu-mano ang iyong mga hinahawakan dahil hindi ito awtomatikong kumokonekta sa iyong wallet o exchange. May opsyon ding idagdag ang mga presyo ng pagbili mo para tumpak na masubaybayan ang mga kita mo.

CoinGecko

Pangunahing nakilala ang CoinGecko dahil sa pagsubaybay nito sa presyo ng cryptocurrency, pero may opsyon din ito sa portfolio. Libre itong gamitin at available ito sa iyong browser o mobile device. Kung regular ka nang gumagamit ng CoinGecko, maganda ring subukan ang tracker.

Blockfolio

Kung gusto mo ng opsyong makapag-trade habang pinapamahalaan ang iyong portfolio, magandang opsyon ang Blockfolio. Nariyan na ang kumpanya mula pa noong 2014 at kilala ito sa larangan ng crypto. Gayunpaman, para lang ito sa mga mobile device, kaya wala itong iniaalok na kaparehong karanasan sa pag-trade ng crypto sa desktop.

Delta

Ang Delta ay isang mobile app na nagbibigay-daan sa iyong tingnan ang iyong portfolio ng crypto at mga tradisyonal na puhunan nang sabay. Puwede itong kumonekta sa 20 palitan at sa iba't ibang wallet, kabilang ang Binance. May libre at bayad na bersyon, pero hindi ka makakapag-trade sa mismong app.

Mga pangwakas na pananaw

Maraming merkado ng cryptocurrency ang nakadepende sa kalagayan ng Bitcoin. Pero hindi ito dahilan para hindi balansehin ang iyong portfolio. Sa pamamagitan ng magkakaibang puhunan sa crypto, puwedeng mabawi ang ilang pagkalugi na nangyayari sa pagbaba ng Bitcoin, kaya naman sulit magsagawa ng pag-diversify kahit papaano. Tandaan, hindi lang basta paghawak ng magkakaibang coin ang pagbabalanse sa iyong portfolio. Malaki ang maitutulong ng pagkakaroon ng kaunting diskarte sa paggawa ng isang portfolio na akma sa panganib na kaya mo.