Ano ang GameFi at Paano Ito Gumagana?
Talaan ng mga Nilalaman
Panimula
Ano ang GameFi?
Paano gumagana ang GameFi?
Play-to-earn na modelo (P2E)
Pagmamay-ari ng digital asset
Mga DeFi application
Itinuturing bang GameFi ang mga video game? 
Paano magsimula sa mga laro sa GameFi?
Ang hinaharap ng GameFi
Mga pangwakas na pananaw
Ano ang GameFi at Paano Ito Gumagana?
HomeMga Artikulo
Ano ang GameFi at Paano Ito Gumagana?

Ano ang GameFi at Paano Ito Gumagana?

Intermediya
Published Mar 25, 2022Updated Apr 28, 2022
8m

TL;DR

Tumutukoy ang GameFi sa mga play-to-earn blockchain game na nag-aalok ng mga insentibong pangkabuhayan sa mga player. Kadalasan, puwedeng makakuha ng mga reward na cryptocurrency at NFT ang mga player sa pamamagitan ng pagkumpleto ng mga gawain, pakikipaglaban sa iba pang player, at pag-usad sa iba't ibang level ng laro.

Hindi tulad ng mga tradisyonal na video game, sa karamihan ng mga laro sa blockchain, naililipat ng mga player ang mga item sa laro mula sa virtual na mundo ng laro. Sa pamamagitan nito, naite-trade ng mga player ang kanilang mga item sa mga marketplace ng NFT at ang mga kinikita nilang crypto sa mga palitan ng crypto.


Panimula

Mabilis nang nauungusan ng GameFi ang industriya ng tradisyonal na gaming mula noong sumikat ang Axie Infinity. Hinihikayat nito ang mga gamer sa pamamagitan ng pag-aalok sa kanila ng pagkakataong kumita habang nag-e-enjoy. Ano ang GameFi, at paano ito naiiba sa mga video game kung saan tayo pamilyar?


Ano ang GameFi?

Ang GameFi ay pinaghalong "game" at "finance." Tumutukoy ito sa mga play-to-earn blockchain game na nag-aalok ng mga insentibong pangkabuhayan sa mga player. Gumagamit ang ecosystem ng GameFi ng mga cryptocurrency, non-fungible token (NFT), at teknolohiya ng blockchain para gumawa ng virtual gaming environment.

Kadalasan, puwedeng makakuha ng mga reward sa laro ang mga player sa pamamagitan ng pagkumpleto ng mga gawain, pakikipaglaban sa iba pang player, at pag-usad sa iba't ibang level ng laro. Puwede rin nilang ilipat ang kanilang mga asset mula sa laro para i-trade sa mga palitan ng crypto at marketplace ng NFT.


Paano gumagana ang GameFi?

Sa GameFi, puwedeng nasa iba't ibang anyo ang reward, gaya ng mga cryptocurrency o mga asset sa laro gaya ng mga virtual na lupa, avatar, armas, at costume. Bawat proyekto ng GameFi ay gagamit ng ibang modelo at ekonomiya ng laro. Kadalasan, ang mga asset sa laro ay mga NFT na tumatakbo sa blockchain, ibig sabihin, puwedeng i-trade ang mga ito sa mga marketplace ng NFT. Gayunpaman, sa ibang sitwasyon, kailangang i-convert sa NFT ang mga asset sa laro bago ito mai-trade o maibenta ng mga player.

Kadalasan, magbibigay ang mga asset sa laro ng ilang partikular na benepisyo sa mga player, na magbibigay-daan sa kanilang makakuha ng mas maraming reward. Pero, nagtatampok din ang ilang laro ng mga avatar at cosmetic na visual lang at walang epekto sa gameplay at kita.

Depende sa laro, puwedeng makakuha ng mga reward ang mga user sa pamamagitan ng pagkumpleto ng mga gawain, pakikipaglaban sa iba pang player, at pagbuo ng mga mino-monetize na istruktura sa lote nila. Sa ilang laro, puwede ring magkaroon ng passive na kita ang mga player nang hindi naglalaro, sa pamamagitan ng pag-stake o pagpapahiram ng kanilang mga gaming asset sa iba pang player. Tingnan natin ang ilan sa mga karaniwang feature sa GameFi.


Play-to-earn na modelo (P2E)

Sa sentro ng mga proyekto ng GameFi, nandoon ang play-to-earn (P2E) bilang rebolusyonaryong gaming mode. Medyo iba ito sa pay-to-play na modelong ginagamit ng mga tradisyonal na video game. Sa pay-to-play, kailangang mamuhunan ng mga gamer bago sila makapagsimulang maglaro. Halimbawa, sa mga video game gaya ng Call of Duty, kailangang bumili ng mga player ng mga lisensya o umuulit na subskripsyon.

Kadalasan, hindi kikita ng pera ang mga player sa mga tradisyonal na video game , at kinokontrol at hinahawakan ng kumpanya ng gaming ang kanilang mga asset sa laro. Sa kabaliktaran, nakakapagbigay ang mga P2E na laro sa mga player ng kumpletong kontrol sa kanilang mga asset sa laro habang nag-aalok din ng mga pagkakataon para kumita sila.

Gayunpaman, tandaan na nakadepende itong lahat sa modelo at disenyo ng laro na ginagamit ng mga proyekto ng GameFi. Ang teknolohiya ng blockchain ay kayang (at dapat) magbigay sa mga player ng kumpletong kontrol sa kanilang mga asset sa laro, pero hindi laging ganoon ang sitwasyon. Siguraduhing naiintindihan mo kung paano gumagana ang laro at kung sino ang nasa likod ng proyekto bago ka sumubok ng P2E na laro.

Ang isa pang dapat tandaan, ang mga P2E na laro ay puwedeng libreng laruin at magbigay pa rin ng mga pampinansyal na reward sa mga player, pero sa ilang proyekto ng GameFi , kinakailangan mong bumili ng mga NFT o cryptoasset bago ka makapaglaro. Dahil dito, laging mahalagang mag-DYOR at suriin ang mga panganib. Kung kailangan ng malaking puhunan bago ka makapagsimula sa isang P2E na laro at maliit ang mga reward, mas malamang na mawala sa iyo ang inisyal mong puhunan.

Isa sa mga pinakasikat na play-to-earn na laro ang Axie Infinity. Isa itong Ethereum-based na NFT game na sumisikat mula pa noong 2018. Puwedeng gamitin ng mga gamer ang kanilang mga NFT pet (Axie) para makakuha ng mga SLP token sa pamamagitan ng pagkumpleto ng mga pang-araw-araw na quest at pakikipaglaban sa iba pang player. 

Puwede rin silang makakuha ng mga reward na AXS kung makakaabot sila sa isang partikular na PvP rank. Dagdag pa rito, puwedeng gamitin ang AXS at SLP para mag-breed ng mga Axie, na puwedeng gamitin sa laro o i-trade sa kanilang opisyal na marketplace ng NFT.

Maliban sa pagbili at pagbebenta ng mga Axie, puwedeng ipahiram ng mga player ang kanilang mga Axie sa iba pang player, na nagbibigay sa mga may-ari ng pagkakataong kumita nang hindi naglalaro. Scholarship ang tawag sa modelong ito ng pagpapahiram. Nagbibigay-daan ito sa mga scholar na gamitin ang mga hiniram na Axie para maglaro at makakuha ng mga reward. 

Sa madaling salita, puwedeng magkaroon ng passive na kita ang mga may-ari ng Axie habang puwede namang maglaro ang mga scholar nang hindi namumuhunan. Pagkatapos, hahatiin ang mga nakuhang reward sa mga scholar at may-ari ng mga Axie.


Pagmamay-ari ng digital asset

Gaya ng natalakay namin, nagbibigay-daan ang teknolohiya ng blockchain sa pagmamay-ari ng digital asset, ibig sabihin, puwedeng i-monetize ng mga player ang kanilang mga asset sa laro sa maraming iba't ibang paraan.

Katulad sa mga video game, puwedeng magmay-ari ang mga player ng mga avatar, pet, bahay, armas, tool, at marami pang iba. Pero sa GameFi, puwedeng iisyu o gawin ang mga asset na ito bilang mga NFT sa blockchain (na kilala rin bilang pag-mint ng NFT). Nagbibigay-daan ito sa mga player na magkaroon ng kumpletong kontrol sa kanilang mga asset nang may authenticity at mave-verify na pagmamay-ari.

Nakatuon ang ilang sikat na laro sa metaverse, gaya ng Decentraland at The Sandbox, sa konsepto ng pagmamay-ari ng lupa. Nagbibigay-daan ang mga ito sa mga player na i-monetize ang kanilang virtual na lupa. Sa The Sandbox, puwedeng bumili ang mga gamer ng mga digital na real estate at puwede nilang i-develop ang mga iyon para kumita. Halimbawa, puwede nilang singilin ang iba pang player na bumibisita sa kanilang lupa, puwede silang makakuha ng mga reward na token sa pamamagitan ng pag-host ng content at mga event, o puwede nilang paupahan ang kanilang naka-customize na lupa sa iba pang player.


Mga DeFi application

Nag-aalok din ang ilang proyekto ng GameFi ng mga produkto at feature ng DeFi, gaya ng pag-stake, pagmimina ng liquidity, at pag-farm ng yield. Kadalasan, puwedeng i-stake ng mga player ang mga token nila sa laro para makakuha ng mga reward, makapag-unlock ng mga eksklusibong item, o makapag-access ng mga bagong level sa laro.
Magiging mas desentralisado rin ang crypto gaming kung maglalagay ng mga elemento ng DeFi. Hindi tulad ng mga tradisyonal na game studio kung saan ginagawang sentralisado ang kontrol sa kanilang mga update sa laro, hinahayaan ng ilang proyekto ng GameFi ang komunidad na lumahok sa kanilang proseso ng pagpapasya. Puwede silang magmungkahi at bumoto sa mga update sa hinaharap sa pamamagitan ng mga decentralized autonomous organization (DAO).

Halimbawa, puwedeng bumoto ang mga player ng Decentraland sa mga patakaran sa laro at organisasyon sa pamamagitan ng pag-lock ng kanilang mga governance token (MANA) sa DAO. Kung mas marami silang token na ila-lock, mas mataas ang kapangyarihan nila sa pagboto. Nagbibigay-daan ito sa mga gamer na direktang makipag-ugnayan sa mga game developer at impluwensyahan ang pag-develop sa laro.


Itinuturing bang GameFi ang mga video game? 

Ang mga player ng mga tradisyonal na video game ay puwede ring kumita ng currency sa laro at mangolekta ng mga digital asset para i-upgrade ang kanilang mga character. Gayunpaman, hindi puwedeng (o hindi dapat) i-trade ang mga token at item na ito sa labas ng laro. Kadalasan, ni wala ngang halaga ang mga ito sa labas ng laro. Kahit na mayroon, kadalasang pinagbabawalan ang mga player na i-monetize o i-trade ang kanilang mga asset sa totoong buhay.

Sa mga laro sa blockchain, karaniwang mga cryptocurrency at NFT ang mga token at asset sa laro. May ilang laro sa blockchain na gumagamit ng mga virtual token sa halip na mga crypto o NFT, pero dapat ma-convert pa rin sa NFT ng mga player ang kanilang mga asset sa laro kung gugustuhin nila. Ibig sabihin nito, maililipat ng mga gamer ang kanilang mga kinita sa mga crypto wallet at maite-trade nila ang kanilang mga asset sa mga palitan ng crypto o marketplace ng NFT. Pagkatapos, puwede rin nilang i-convert sa fiat na pera ang kanilang mga kinita sa crypto.


Paano magsimula sa mga laro sa GameFi?

May libo-libong laro sa blockchain sa merkado, at magkakaiba ang paggana ng mga ito. Mag-ingat sa mga scam na proyekto at mga pekeng website. Puwedeng maging delikado ang pagkonekta ng iyong wallet o pag-download ng mga laro mula sa mga random na website. Mainam kung gagawa ka ng bagong crypto wallet na partikular na para sa layuning ito at kung gagamit ka lang ng mga pondong kaya mong mawala sa iyo. Kung kumpyansa kang ligtas ang nakita mong laro, sundin ang mga hakbang na ito para makapagsimula.


1. Gumawa ng crypto wallet

Para ma-access ang mundo ng GameFi , kailangan mo ng compatible na cryptocurrency wallet, gaya ng Trust Wallet o MetaMask. Depende sa nilalaro mo, baka kailangan mong gumamit ng ibang wallet o kumonekta sa ibang network ng blockchain.
Halimbawa, kung gusto mong maglaro ng mga blockchain game sa BNB Smart Chain (dating Binance Smart Chain), kakailanganin mo munang ikonekta ang iyong MetaMask sa BSC network. Puwede mo ring gamitin ang Trust Wallet o anupamang sinusuportahang crypto wallet. Tingnan ang opisyal na website ng laro para malaman kung alin ang mga sinusuportahan nila.

Puwede mo ring ikonekta ang iyong crypto wallet sa blockchain ng Ethereum at i-access ang karamihan ng mga larong gumagana sa network ng Ethereum . Gayunpaman, bubuo ng sariling wallet ang ilang laro gaya ng Axie Infinity at Gods Unchained para mabawasan ang gastusin at mapaganda ang performance.

Binuo ang Axie Infinity sa Ethereum, pero binuo ng team nila ang network ng Ronin bilang sidechain. Dahil dito, kailangan mong gamitin ang opisyal na Ronin Wallet para makipag-interact sa ecosystem ng Axie Infinity. Bilang sidechain, ginagawang di-hamak na mas mura ng network ng Ronin ang pag-trade at pag-breed ng mga Axie, na nakakapagpababa sa gastusin sa paglalaro.


2. Ikonekta ang iyong wallet sa laro

Para makapaglaro ng blockchain game, kakailanganin mong ikonekta ang iyong wallet. Siguraduhing kumokonekta ka sa opisyal na website nito at hindi sa pekeng kopya. Pumunta sa website ng laro at hanapin ang opsyong ikonekta ang iyong crypto wallet.

Hindi tulad ng mga tradisyonal na online na laro kung saan kinakailangan mong mag-set up ng username at password, ginagamit ng karamihan ng mga laro sa blockchain ang crypto wallet mo bilang gaming account, kaya malamang na hilingin sa iyong mag-sign ng mensahe sa wallet mo bago ka makakonekta sa laro.


3. Tingnan ang mga kinakailangan para makapaglaro 

Sa karamihan ng mga proyekto ng GameFi, kakailanganin mong bilhin ang kanilang cryptocurrency token o mga NFT sa laro para makapagsimula ka. Nag-iiba-iba ang mga kinakailangan batay sa laro, pero lagi mo dapat isaalang-alang ang potensyal na kumita at ang mga pangkalahatang panganib. Siguraduhing tantyahin kung gaano katagal bago mo mababawi ang iyong inisyal na puhunan at bago ka kikita.

Kung gusto mong maglaro ng Axie Infinity, kailangan mo ng 3 Axie sa iyong wallet sa laro. Makakabili ka nito sa Axie Marketplace. Para makabili ng mga Axie, kailangan mo ng wrapped ETH (WETH) sa iyong Ronin Wallet. Makakabili ka ng ETH sa mga palitan ng crypto gaya ng Binance at puwede mong gamitin ang Ronin bridge para ilipat ang mga ito sa iyong Ronin Wallet. Para sa higit pang impormasyon, tingnan ang Paano Gamitin ang Ronin Wallet?

Kung wala kang pera o ayaw mong sumugal, pag-isipang maghanap ng scholarship program. Sa pamamagitan nito, makakahiram ka ng mga NFT na lalaruin, pero kakailanganin mong ibahagi ang kita mo sa mga may-ari ng NFT.


Ang hinaharap ng GameFi

Biglang lumaki ang bilang ng mga proyekto ng GameFi noong 2021 at malamang na patuloy itong lalaki sa mga darating na taon. Mula Marso 2022, may mahigit 1,400 laro sa blockchain sa nakalista sa DappRadar. Mayroon na tayo ngayong mga sikat na laro sa maraming iba't ibang blockchain, gaya ng Ethereum, BNB Smart Chain (BSC), Polygon, Harmony, Solana, at marami pang iba.

Habang patuloy na nade-develop ang teknolohiya ng blockchain , inaasahang mabilis na magpapatuloy ang trend ng paglago ng GameFi. Dahil sa kakayahang magmay-ari ng mga asset sa laro at kumita sa mga laro, talagang nakakahikayat ang GameFi, lalo na sa mga umuunlad na bansa.


Mga pangwakas na pananaw

Mula noong nag-uumpisa pa lang ang Bitcoin, may mga tao nang sumusubok sa kanilang kapalaran sa mga simpleng laro sa browser, sa pag-asang kumita sa BTC. Bagama't mayroon pa ring mga laro sa BTC, talagang nagbago ang mundo ng blockchain gaming dahil sa pagsikat ng Ethereum at mga smart contract, at nakakapag-alok na ito ngayon ng mga mas detalyado at interesanteng karanasan.

Madaling makita kung paano nahihimok ng GameFi ang mga gamer sa pamamagitan ng pagsasama ng entertainment at mga pampinansyal na insentibo. Sa pagsikat ng mga laro sa blockchain, pinakamalamang na makakita tayo ng lumalaking bilang ng malalaking kumpanya na bumubuo sa metaverse.