Ano ang Yield Guild Games (YGG)?

TL;DR

Ang Yield Guild Games (YGG) ay isang gaming guild na nakatuon sa mga play-to-earn na laro sa blockchain. Isa itong komunidad na namumuhunan sa mga NFT asset at nagkokone-konekta ng mga blockchain gamer sa buong mundo. Layunin nilang bumuo ng network ng mga manlalaro at namumuhunan na nagtutulungan para makapagsimula at lumago sila sa mundo ng NFT gaming.

Panimula

Mula noong naging matagumpay ang Axie Infinity, mabilis nang lumalaki ang mundo ng mga play-to-earn (P2E) na laro sa blockchain. Bagama't milyon-milyong tao sa buong mundo ang nahikayat ng trend ng P2E, hindi abot-kaya ang mga gaming NFT para sa maraming player, lalo na sa mga bansang umuunlad. Bumubuo ang Yield Guild Games ng isang komunidad ng P2E at nag-aalok ito ng solusyon sa mga manlalarong ito, para makapagsimula sila sa NFT gaming.

Ano ang Yield Guild Games (YGG)?

Ang Yield Guild Games (YGG) ay isang Decentralized Autonomous Organization (DAO) na namumuhunan sa mga non-fungible token (NFT) na ginagamit sa mga laro sa blockchain. Bahagi ang mga larong ito ng mas malawak na konseptong kilala bilang metaverse. Tumutukoy ang terminong metaverse sa maraming elemento ng mga blockchain-based na digital na mundo, kasama na ang digital na lupa, mga digital asset, at higit pa.

Nagsimula ang ideya ng paggawa ng pandaigdigang komunidad ng play-to-earn gaming noong 2018. Napansin ni Gabby Dizon, co-founder at CEO ng YGG, na trending ang blockchain gaming sa Southeast Asia. Noong panahong iyon, maraming gamer ang gustong magsimula sa sikat na NFT game na Axie Infinity, pero wala silang perang pambili ng mga NFT character sa laro na tinatawag na mga Axie.

Dahil nauunawaan niyang posibleng maging kapaki-pakinabang na tool ang blockchain gaming para sa mga nakatira sa mga bansang umuunlad, sinimulang ipahiram ni Dizon ang kanyang mga Axie sa iba pang manlalarong hindi kayang bumili ng sarili nilang mga Axie. Nagbigay ito sa kanya ng inspirasyong samahan si Beryl Li sa pagtatatag ng Yield Guild Games noong 2020 para tulungan ang mga gamer na magtagumpay sa mundo ng mga NFT at blockchain gaming.

Paano gumagana ang Yield Guild Games?

Pinagsasama ng Yield Guild Games ang Decentralized Finance (DeFi) at mga NFT para gumawa ng ekonomiya ng metaverse sa blockchain ng Ethereum. Ang YGG DAO ay isang open-source na protocol na may mga panuntunang ipinapatupad ng mga smart contract. Marami itong iba't ibang layunin, gaya ng pagpapatupad ng mga desisyon sa pamamahala na pinagbotohan ng komunidad, pagbibigay ng mga reward, at pangangasiwa ng mga rental ng NFT.

Binubuo ang YGG ng maraming SubDAO, na binubuo ng mga grupo ng mga manlalaro mula sa isang partikular na NFT game o heograpikong lokasyon. Bawat SubDAO ay may sariling hanay ng mga panuntunan para mapamahalaan ang mga aktibidad at asset ng kaukulang play-to-earn na laro.

Nagbibigay-daan ang modelong ito sa mga manlalaro ng parehong NFT game na magtulungan para ma-maximize ang kanilang mga kita sa laro. Nagbibigay-daan din ito sa mga miyembro ng guild na rentahan at gamitin ang mga NFT asset na pagmamay-ari ng komunidad para makakuha ng mga reward sa laro. Bilang kapalit, ang mga magpapahiram ng kanilang mga NFT sa pamamagitan ng DAO ay puwedeng makihati sa kikitain ng mga gamer.

Sa YGG, naka-store ang lahat ng NFT at digital asset sa YGG Treasury, na kinokontrol ng komunidad. Ibinibigay ng treasury ang mga NFT sa bawat SubDAO, at kasama rito ang mga P2E asset mula sa maraming laro sa blockchain.

Mga Scholarship ng YGG

Para ma-maximize ang halaga at gamit ng mga gaming NFT, gumagamit ang YGG DAO ng programa sa pagrenta ng NFT na kilala bilang mga scholarship. Unang ipinakilala ng komunidad ng Axie Infinity ang ideya para parehong makinabang ang mga may-ari ng NFT at play-to-earn gamer.

Sa Axie Infinity, puwedeng hiramin ng mga may-ari ng Axie ang kanilang mga gaming asset para matulungan ang mga bagong manlalaro na makapagsimula kapalit ng porsyento ng kanilang mga reward sa laro. Isinasagawa ang proseso sa pamamagitan ng mga smart contract sa blockchain sa paraan kung saan magagamit lang ng mga scholar ang mga NFT sa laro. Ang manager (may-ari) lang ang makakapag-trade o makakapaglipat ng mga NFT.

Gayundin, nagbibigay ang YGG ng mga scholarship sa mga bagong manlalaro sa isang modelo ng pagbabahagi ng kita, kung saan puwede silang kumuha ng mga NFT asset para makapagsimulang maglaro at makakuha ng mga reward sa laro. Hindi kailangang mamuhunan ng pera agad-agad ang mga scholar, pero ibabahagi nila ang isang parte ng kikitain nila sa kanilang mga manager. Maliban sa mga NFT, makakatanggap din ang mga bagong manlalaro ng training at patnubay mula sa mga manager ng komunidad.

Hindi limitado ang mga scholarship ng YGG sa mga NFT sa Axie Infinity. Nagmamay-ari din ang YGG Treasury ng mga virtual na lupa sa The Sandbox at League of Kingdoms, mga virtual na sasakyan sa F1 Delta Time, maliban sa iba pang play-to-earn na laro.

Mga SubDAO

Gaya ng nabanggit, ang YGG DAO ay pangunahing binubuo ng mga SubDAO. Puwede mong ituring ang mga SubDAO bilang mga isinalokal na komunidad sa pangunahing YGG DAO. Ang mga lokal na komunidad na ito ay binubuo ng mga manlalaro mula sa isang partikular na P2E na laro o lokasyon. Halimbawa, may SubDAO na para lang sa mga manlalaro ng Axie Infinity, isang SubDAO para sa mga manlalaro ng The Sandbox, isa pang SubDAO para sa mga manlalaro sa Southeast Asia, at iba pa. Sa pamamagitan ng pagpapangkat ng mga manlalaro sa iba't ibang SubDAO, puwede silang magtalakayan tungkol sa mga diskarte sa paglalaro at magtulungan para ma-maximize ang performance.

Pinapamahalaan ng bawat SubDAO ang mga aktibidad at asset ng kaukulan nitong laro alinsunod sa sarili nitong hanay ng mga panuntunan at kondisyon, pero nag-aambag pa rin ang mga ito ng kita sa YGG DAO. Sa isang SubDAO, may pinuno ng komunidad, wallet, at token ng SubDAO. Puwedeng makihati ang mga may-hawak ng token sa mga yield na nabuo mula sa gameplay batay sa mga kontribusyon nila. Puwede rin silang magmungkahi at bumoto sa mga desisyon sa pamamahala kaugnay ng SubDAO, halimbawa, kung bibili pa ba ng mga NFT, o kung paano pamahalaan ang kanilang mga asset.

Ano ang YGG token?

Ang Yield Guild Games (YGG) ay isang ERC-20 token na nagbibigay sa mga may-hawak ng karapatang lumahok sa pamamahala sa YGG DAO. Mayroon itong kabuuang supply na 1 bilyong token, at 25 milyong YGG ang ibinenta sa pamamagitan ng isang Initial DEX Offering (IDO) sa SushiSwap noong 2021. Para masuportahan ang komunidad, itinabi ng YGG ang 45% ng kabuuang supply na unti-unting ipapamahagi sa mga user sa loob ng apat na taon.

Bilang native token ng platform, ginagamit ang YGG para magbayad ng mga serbisyo sa network. Puwede rin itong i-stake para makakuha ng mga reward sa mga vault ng YGG o gamitin para makapag-unlock ng eksklusibong content sa Discord channel ng YGG. Dagdag pa rito, ang mga may-hawak ng YGG ay puwedeng magsumite ng mga panukala at bumoto sa mga desisyon tungkol sa teknolohiya, mga produkto, mga proyekto, pamamahagi ng token, at pangkalahatang istruktura ng pamamahala ng guild. Bibigyan ng reward na mga YGG token ang mga mananalong suhestyon na maipapatupad sa DAO.

Vault ng YGG

Iba ang diskarte ng YGG DAO sa pag-farm ng yield kumpara sa karamihan ng mga platform ng pag-stake sa DeFi. Kadalasan, sine-stake ang mga token para kumita ng interes na may nakatakdang rate. Sa YGG, bawat vault ay kumakatawan sa isang programa ng reward na token para sa isang partikular na aktibidad na pinapatakbo ng YGG. Halimbawa, puwedeng magbigay ng mga yield ang isang vault batay sa performance ng isang programa ng scholarship, habang ang isa pang vault ay nagbibigay ng mga reward sa mga nagse-stake batay sa programa sa pag-breed ng Axie.

Plano ring bumuo ng YGG ng all-in-one super index vault na kumakatawan sa lahat ng aktibidad sa ecosystem nito na bumubuo ng yield. Bibigyan ng reward ng vault na ito ang mga nagse-stake batay sa kita ng guild mula sa mga subskripsyon, merchandise, rental, paglago ng treasury, at index performance ng SubDAO.

Puwedeng mag-stake ang mga may-hawak ng token para sa sinusuportahan nilang aktibidad, at ipapamahagi ang mga reward nang proporsyonal sa halaga ng YGG na ise-stake nila sa pamamagitan ng mga smart contract. Depende kung paano naka-program ang vault, posibleng kasama rin sa mga reward ang mga YGG token, Ether (ETH), o stablecoin.

Paano bumili ng YGG sa Binance?

Makakabili ka ng Yield Guild Games (YGG) sa mga palitan ng cryptocurrency gaya ng Binance.

1. Mag-log in sa iyong account sa Binance at i-click ang [Mag-trade]. Piliin ang classic o advanced na mode ng pag-trade para magsimula.

2. Mag-click sa [BTC/USDT] para buksan ang search bar at i-type ang “YGG” para makita ang mga available na pares sa pag-trade. YGG/BUSD ang gagamitin natin bilang halimbawa.

3. Pumunta sa kahong [Spot] sa kanan at ilagay ang halaga ng YGG na bibilhin. Sa halimbawang ito, gagamit tayo ng Market order. I-click ang [Bumili ng YGG] para kumpirmahin ang iyong order, at ike-credit ang biniling YGG sa Spot Wallet mo.

Mga pangwakas na pananaw

Sa pamamagitan ng natatanging modelo ng pagbabahagi ng kita, bumubuo ang YGG ng isang desentralisadong komunidad sa totoong buhay. Nag-aalok ito sa mga kalahok ng pagkakataong magtagumpay sa mga virtual na mundong ito sa pamamagitan ng makabagong ekonomiya ng gaming. Habang dumarami ang mga proyekto sa metaverse, puwedeng makinabang ang mga NFT guild gaya ng Yield Guild Games sa pagdagsa ng mga baguhan at mahilig sa crypto na gustong i-explore ang mga play-to-earn NFT game para magkaroon ng alternatibong mapagkakakitaan.