რა არის MiCA (კრიპტო აქტივების ბაზრების რეგულაცია)?

TL;DR

• MiCA ევროკავშირის მიერ გამოცემული კრიპტოვალუტის მარეგულირებელი პირველი აქტია, რომელშიც მკაფიოდაა ჩამოყალიბებული ბაზრის მონაწილეთათვის განსაზღვრული სტანდარტები და ფოკუსირებულია მომხმარებლის დაცვაზე, ფინანსურ სტაბილურობაზე და ინოვაციაზე.

• ევროკავშირის MiCA რეგულაციის მიზანია ლიცენზირების პროცესის გამარტივება, სტეიბლკოინებზე ზედამხედველობა და ფულის გათეთრების საწინააღმდეგო ზომების გაუმჯობესება.

• ევროკავშირმა მნიშვნელოვნად გაუსწრო სხვა რეგიონებს კრიპტოსთან დაკავშირებული რეგულაციების შემუშავების მხრივ, თუმცა MiCA შეიძლება დაკავშირებული იყოს  პოტენციურ უარყოფით შედეგებთან, რაც მოიცავს შესაბამისობის უზრუნველყოფის ხარჯების გაზრდას, მომხმარებელთა ანონიმურობის დონის შემცირებას და გადაჭარბებული რეგულაციების შემოღებას.

რა არის MiCA (კრიპტო აქტივების ბაზრების რეგულაცია)?  

კრიპტო აქტივების ბაზრების რეგულაცია (MiCA) წარმოადგენს ევროკავშირის მიერ მომზადებულ უმნიშვნელოვანეს მარეგულირებელ აქტს, რომელთან დაკავშირებითაც კონსენსუსის მიღწევა მოხდა 2022 წლის ოქტომბერში. ევროპარლამენტმა MiCA-ს რატიფიცირება მოახდინა 2023 წლის 20 აპრილს. ის მსოფლიოში პირველი მსგავსი ტიპის აქტია და მასში წარმოდგენილია კრიპტო ბაზრის მონაწილეთათვის განსაზღვრული ნათლად ჩამოყალიბებული გაიდლაინები და სტანდარტები, რომელთა მიზანია მომხმარებელთა დაცვა და ბაზრის მთლიანობის შენარჩუნება.

MiCA-ს ამოქმედება დაგეგმილია 2024 წლის შუა პერიოდში ან 2025 წლის დასაწყისში, რის შემდეგაც ევროპა გახდება პირველი რეგიონი, რომელიც მოახდენს ამ ტიპის მარეგულირებელი აქტის იმპლემენტაციას. MiCA-ს მიზანია, სტანდარტიზებული მიდგომის შემუშავების მეშვეობით ინოვაციების მხარდაჭერა, კრიპტო ბაზრის ზრდის ხელშეწყობა და ამავდროულად პოტენციურ რისკებთან და გამოწვევებთან გამკლავება.

რა არის MiCA-ს ძირითადი კომპონენტები?

MiCA რამდენიმე მნიშვნელოვანი კომპონენტისგან შედგება, რომელთა მიზანია ევროპის კრიპტო ბაზარზე გამჭვირვალობის, სტაბილურობის და მომხმარებლის დაცვის უზრუნველყოფა.

1. ლიცენზირებასთან დაკავშირებული მოთხოვნები

MiCA-ს ერთ-ერთ ძირითად კომპონენტს წარმოადგენს კრიპტო აქტივების გამომშვები ორგანიზაციებისთვის (ზოგიერთი გამონაკლისის გარდა) და კრიპტოსთან დაკავშირებული სერვისების, მაგალითად ბირჟების და საფულეების პროვაიდერებისთვის ლიცენზირების მოთხოვნების განსაზღვრა. ეს წესები ხელს უწყობს მონეტის პირველადი შემოთავაზების (ICO) და უსაფრთხოების ტოკენის შემოთავაზების (STO) პროცესების გამარტივებას და უზრუნველყოფს მონეტების გამომშვების მიერ მონაცემების გამჟღავნებასთან და გამჭვირვალობასთან დაკავშირებული მოთხოვნების შესრულებას.

2. სტეიბლკოინები და აქტივით უზრუნველყოფილი ტოკენები

MiCA შეიცავს აქტივებზე მიბმული ტოკენებისთვის (ART) და ელექტრონული ფულის ტოკენებისთვის (EMT) განსაზღვრულ კონკრეტულ მოთხოვნებს, რომლებიც დაკავშირებულია ფინანსური სტაბილურობის პოტენციურ რისკებთან. ART აღნიშნავს კრიპტო ტოკენს, რომელიც შეიძლება გადაიცვალოს რამდენიმე ფიატ-ვალუტაზე, ფიზიკურ აქტივზე ან კრიპტოვალუტაზე, EMT კი აღნიშნავს მხოლოდ ერთ-ფიატ ვალუტაზე მიბმულ ტოკენს. აღნიშნული აქტი განსაზღვრავს ავტორიზაციის პროცესებს, კაპიტალთან დაკავშირებულ მოთხოვნებს და სტეიბლკოინების გამომშვები ორგანიზაციის მართვის სტრუქტურას, რაც ეხმარება მათ სტაბილურობის შენარჩუნებაში და უზრუნველყოფს მათ მიერ აქტივების მინიმალურ რეზერვებთან დაკავშირებული მოთხოვნების დაკმაყოფილებას.

3. ფულის გათეთრების საწინააღმდეგო (AML) და ტერორიზმის დაფინანსების საწინააღმდეგო (CTF) წესები

MiCA უზრუნველყოფს ფულის გათეთრების საწინააღმდეგო (AML) და ტერორიზმის დაფინანსების საწინააღმდეგო (CTF) წესების ხელშეწყობას. ის პროვაიდერებისგან მოითხოვს მკაცრი AML/CTF პროცედურების დანერგვას არსებული რეგულაციების, მაგალითად ევროკავშირის ფულის გათეთრების საწინააღმდეგო დირექტივის (AMLD) შესაბამისად. შედეგად გამარტივდება კრიპტო ეკოსისტემაში უკანონო საქმიანობებთან დაკავშირებული რისკების მართვა.

4. მომხმარებელთა უსაფრთხოების უზრუნველყოფა

MiCA-ს მომხმარებელთა უსაფრთხოების უზრუნველყოფის ზომები გარკვეულ ვალდებულებებს აკისრებს ბაზრის მონაწილეებს, რაც უზრუნველყოფს ინვესტორების და ტრეიდერების დაცვას. ეს მოიცავს ხელშეკრულების გაფორმების წინ ინფორმაციის გამჟღავნებას, მიზნობრივი რეკლამების განთავსების წესებს და სერვისების შემოთავაზებებისთვის სავალდებულო გამჭვირვალობას. გამჭვირვალობის და ინფორმაციის გამჟღავნების მკაცრი მოთხოვნები MiCA-ს საშუალებას აძლევს ბაზრის მონაწილეებს დააკისროს პასუხისმგებლობა, რაც შეამცირებს თაღლითობის და არასანქცირებული აქტივობების ალბათობას.

5. ზედამხედველობა და აღსრულების უზრუნველყოფა

MiCA წარმოადგენს ზედამხედველობის და აღსრულების სისტემას, რაც მოიცავს ეროვნული და საერთაშორისო დონის ზედამხედველობის ორგანოების ჩამოყალიბებას. ეროვნული ორგანოები ზედამხედველობას გაუწევენ სერვისის პროვაიდერებს, ხოლო ევროპის ფასიანი ქაღალდების და ბაზრების ზედამხედველობის ორგანო (ESMA) განახორციელებს კონკრეტული ასპექტების, მაგალითად სტეიბლკოინების და საერთაშორისო სერვისების ზედამხედველობას. ეროვნულ და საერთაშორისო ორგანოებს შორის თანამშრომლობა ხელს შეუწყობს MiCA-ს რეგულაციების აღსრულებას ევროკავშირის მასშტაბით.

რა გავლენას მოახდენს MiCA კრიპტო ბაზარზე?

MiCA-ს ამოქმედება სერიოზულ გავლენას მოახდენს ევროპის კრიპტო ბაზრის მონაწილეებზე. სტანდარტიზებული გაიდლაინების ამოქმედება და მკაფიოდ გაწერილი რეგულაციების არსებობა კომპანიებს გაუმარტივებს ფუნქციონირებას. ბირჟებს და საფულეებს შესაძლოა დასჭირდეთ თავიანთი პლატფორმების მოდიფიცირება მათ ახალ მოთხოვნებთან შესაბამისობაში მოსაყვანად. 

მეორე მხრივ, ინდივიდუალურ ინვესტორებს სარგებელს მოუტანს მომხმარებლის დაცვის გაუმჯობესება და გამჭვირვალობის გაზრდა, თუმცა არსებობს გარკვეული შეშფოთება იმასთან დაკავშირებით, რომ ფულის გათეთრების საწინააღმდეგო (AML) მკაცრი ღონისძიებების გატარება და Know Your Customer (KYC) ავთენტიფიკაციის სისტემის დანერგვა საფრთხეს შეუქმნის კონფიდენციალურობას.

რა სარგებლის მოტანა შეუძლია MiCA-ს ? 

კრიპტო აქტივების ბაზრების რეგულაციას (MiCA) ევროპის კრიპტო ბაზრისთვის და მისი მონაწილეებისთვის უამრავი პოტენციური სარგებლის მოტანა შეუძლია.

1. მომხმარებელთა უსაფრთხოების უზრუნველყოფა 

MiCA გვთავაზობს მკაფიოდ ჩამოყალიბებულ წესებს და ინფორმაციის გამჟღავნების სტანდარტიზებულ მოთხოვნებს, რომელიც უზრუნველყოფს ინვესტორების დაცვას კრიპტო ბაზარზე მოქმედი თაღლითებისგან და ბოროტმოქმედებისგან. მომხმარებელთა უსაფრთხოების დონის გაუმჯობესება გაზრდის ბაზრის მიმართ ინვესტორთა ნდობას და გაუჩენს მათ ბაზარზე აქტიური მონაწილეობის სურვილს.

2. ბაზრის ერთიანობა 

ბაზრის მონაწილეების, მაგალითად ბირჟების და საფულის პროვაიდერების მუშაობის რეგულირებით და მათზე ზედამხედველობით, MiCA აუმჯობესებს ბაზრის გამჭვირვალობის და ერთიანობის დონეს, რაც ხელს უწყობს სამართლიანი და კონკურენტული გარემოს შექმნას.

3. ინსტიტუციური ინვესტიციების გაზრდა

MiCA-ს მიერ შემოთავაზებული სამართლებრივი ბაზის და მარეგულირებელი აქტის არსებობა ხელს შეუწყობს ინსტიტუციური ინვესტიციების მოზიდვას. ინსტიტუციური ინვესტორების მონაწილეობის მასშტაბის ზრდა გამოიწვევს ბაზარზე მეტი კაპიტალის შემოდინებას, რაც თავის მხრივ ხელს შეუწყობს კრიპტო ბაზრის განვითარებას.

4. ლეგიტიმაცია და ინოვაცია

სტანდარტიზებული რეგულაციის არსებობა გაზრდის კრიპტო ბაზრის ლეგიტიმაციას, რაც გაზრდის მთავრობების მიერ მისი მხარდაჭერის ალბათობას. სტაბილური და გამჭვირვალე მარეგულირებელი გარემო ასე წაახალისებს ინოვაციებს და ინვესტიციებს ევროკავშირის რეგიონში.

რა უარყოფითი მხარეები გააჩნია MiCA-ს? 

MiCA-ს მიზანია კრიპტო ბაზრისთვის ყოვლისმომცველი მარეგულირებელი გარემოს შექმნა ევროკავშირში ამ ბაზრის განვითარების ხელშეწყობის მიზნით, თუმცა მისი ამოქმედება გარკვეულ სირთულეებთანაა დაკავშირებული.

1. შესაბამისობასთან დაკავშირებული ხარჯების გაზრდა 

MiCA ბაზრის მონაწილეებს ავალდებულებს შესაბამისობასთან დაკავშირებული დამატებითი პროცედურების გახორციელებას, რაც გაზრდის საოპერაციო ხარჯებს, განსაკუთრებით მცირე მასშტაბის ფირმებისთვის და სტარტაპებისთვის, რომელთაც შეიძლება გაუჭირდეთ შესაბამისობასთან დაკავშირებული რესურსების მოძიება.

2. ფსევდოანონიმურობის დონის შემცირება

MiCA-ს ფულის გათეთრების საწინააღმდეგო (AML) მკაცრმა ზომებმა და Know Your Customer (KYC) ავთენტიფიკაციის პირობებმა შეიძლება გამოიწვიოს ბაზრის მონაწილეების ფსევდოანონიმურობის  დონის შემცირება. აღნიშნულმა ასპექტმა შეიძლება ევროკავშირის კრიპტო ბაზარზე ვაჭრობის სურვილი დაუკარგოს პირებს, რომელთათვისაც მნიშვნელოვანია კონფიდენციალურობა.

3. გადაჭარბებული რეგულირება 

ინდუსტრიის ზოგიერთი მონაწილე ფიქრობს, რომ გადაჭარბებულმა რეგულირებამ შეიძლება ხელი შეუშალოს ინოვაციებს და კონკურენციას, რადგან ბაზრის მონაწილეებს შესაძლოა გაუჭირდეთ დიდი რაოდენობის სამართლებრივ მოთხოვნებში ორიენტირება. MiCA-ს ამოქმედება ინოვაციებისთვის ხელის შეშლის გარეშე, სერიოზულ გამოწვევას წარმოადგენს მარეგულირებელი ორგანოებისთვის.

4. ბაზარზე შესვლის ბარიერები მცირე კომპანიებისთვის 

MiCA-ს მოთხოვნებთან შესაბამისობისთვის საჭირო რესურსების სიმცირე შესაძლოა დაბრკოლებას წარმოადგენდეს მცირე კომპანიებისთვის და სტარტაპებისთვის, რაც პრივილეგირებულ მდგომარეობაში ჩააყენებს მსხვილ, მეტი რესურსების მქონე მონაწილეებს. მსგავსმა დაბრკოლებებმა შეიძლება შეამციროს კრიპტო ბაზრის დივერსიფიკაცია და შეაფერხოს დარგის განვითარება.

შეჯამება 

MiCA წარმოადგენს მნიშვნელოვან და ყოვლისმომცველ ინიციატივას, რომლის მიზანია მზარდი კრიპტო ბაზრის რეგულირება ევროკავშირში. ამ აქტის მიზანია სტანდარტიზებული რეგულაციების წარმოდგენის მეშვეობით ბალანსის მოძიება კრიპტო ბაზრის მომხმარებელთა უსაფრთხოების უზრუნველყოფას, ბაზრის ერთიანობას და ინოვაციებს შორის და უსაფრთხოების, გამჭვირვალობისა და ანგარიშვალდებულების გაუმჯობესება. 

MiCA-ს ამოქმედება დაკავშირებულია როგორც შესაძლებლობების გაჩენასთან, ასევე გამოწვევებთან, ამიტომ ბაზრის მონაწილეებმა უნდა გაითვალისწინონ ამ აქტის პოტენციური ზეგავლენა მათ საქმიანობაზე. MiCA-ს ამოქმედების პროცესი დაწყებულია, ამიტომ შესაბამისობასთან დაკავშირებით ინფორმირებულობას და პროაქტიულობას გადამწყვეტი მნიშვნელობა აქვს ბაზრის ყველა მონაწილისთვის.

დამატებითი საკითხავი

• როგორ ვივაჭროთ კრიპტოთი პასუხისმგებლობით

• როგორ ხდება კრიპტოვალუტის დაბეგვრა?

• აქტივების განაწილების და დივერსიფიკაციის განმარტება

უარი პასუხისმგებლობაზე და რისკის შესახებ გაფრთხილება: ეს კონტენტი თქვენთვის წარმოდგენილია „არსებული სახით“ და განკუთვნილია მხოლოდ საინფორმაციო და საგანმანათლებლო მიზნებისთვის, რაიმე სახის რეპრეზენტაციისა თუ გარანტიის გარეშე. იგი არ უნდა იქნას აღქმული, როგორც ფინანსური, იურიდიული ან პროფესიული რჩევა და არ არის განკუთვნილი იმისთვის, რომ რეკომენდაცია გაუწიოს რაიმე სახის კონკრეტული პროდუქტის, ან სერვისის შეძენას. რჩევის მისაღებად უნდა მიმართოთ შესაბამის პროფესიონალ მრჩეველს. რადგან წინამდებარე სტატია მოწოდებულია მესამე მხარის მიერ, გაითვალისწინეთ, რომ მასში წარმოდგენილი შეხედულებები ეკუთვნის მესამე მხარეს და არ წარმოადგენს Binance Academy-ს მოსაზრებებს. დამატებითი ინფორმაციის მისაღებად, სრულად გაეცანით აქ წარმოდგენილ პასუხისმგებლობაზე უარის განაცხადს. ციფრული აქტივების ფასები შეიძლება იყოს არასტაბილური. თქვენი ინვესტიციის ღირებულებამ შეიძლება დაიკლოს ან მოიმატოს და შესაძლოა ვერ შეძლოთ ინვესტირებული თანხის დაბრუნება. თქვენ ერთპიროვნულად ხართ პასუხისმგებელი თქვენს საინვესტიციო გადაწყვეტილებებზე და Binance Academy არ არის პასუხისმგებელი თქვენ მიერ განცდილ რაიმე ზარალზე. აქ მოცემული ინფორმაცია არ უნდა იქნას აღქმული, როგორც რაიმე სახის ფინანსური, იურიდიული, ან პროფესიული რჩევა. დამატებითი ინფორმაციის მისაღებად, გაეცანით ჩვენს გამოყენების წესებს და რისკის შესახებ გაფრთხილებას.