ცირკულირებადი მარაგი
ცირკულირებადი მარაგი არის ამჟამად ხელმისაწვდომი და ბაზარზე მიმოქცევაში არსებული კრიპტოვალუტის მონეტების ან ტოკენების რაოდენობა. ის მოიცავს საზოგადოების მფლობელობაში არსებულ ერთეულებს და მასში არ არის გათვალისწინებული ის მონეტები, რომლებიც ამჟამად დაბლოკილია, რეზერვის სახითაა შენახული ან ჯერ არ არის გამოშვებული.
ის არის მარაგთან დაკავშირებული სამი მაჩვენებლიდან ერთ-ერთი, რომლებიც ხშირად ერთმანეთში ერევათ; დანარჩენი ორია
საერთო მარაგი და
მაქსიმალური მარაგი. საერთო მარაგი არის ამჟამად არსებული, ანუ უკვე გამოშვებული მონეტების რაოდენობა, მინუს ნებისმიერი მონეტა, რომელიც სამუდამოდ არის ამოღებული მიმოქცევიდან. საერთო მარაგი არის ცირკულირებადი რაოდენობა პლუს მონეტები, რომლებიც დაბლოკილია ესქროს ან ვესტინგის კონტრაქტებში. მაქსიმალური მარაგი არის მონეტების მთლიანი რაოდენობა, რომელიც ოდესმე იქნება მიმოქცევაში, მათ შორის ერთეულები, რომლებიც შესაძლოა მომავალში შეიქმნას.
კრიპტოვალუტის ცირკულირებადი მარაგი შეიძლება დროთა განმავლობაში გაიზარდოს ან შემცირდეს, რაც დამოკიდებულია ქსელის დიზაინზე. ახალი მონეტები მიმოქცევაში შესაძლოა ეტაპობრივად გაეშვას, ხოლო სხვა მექანიზმებმა შესაძლოა მონეტები ბაზრიდან სამუდამოდ ამოიღოს.
მაგალითად,
Bitcoin-ის ცირკულირებადი მარაგი ნელა იზრდება, რადგან ახალი მონეტები იქმნება
მაინინგის გზით: ეს არის პროცესი, რომელიც ბლოკჩეინზე ახალ ბლოკებს საშუალოდ დაახლოებით ყოველ 10 წუთში ერთხელ ამატებს. ეს ეტაპობრივი გამოშვება გაგრძელდება მანამ, სანამ მონეტების რაოდენობა მაქსიმალურ მარაგს - 21 მილიონს არ მიაღწევს.
ცირკულირებადი მარაგი ასევე შეიძლება შემცირდეს.
მონეტების წვის მექანიზმის მეშვეობით ხდება მონეტების მიმოქცევიდან სამუდამოდ ამოღება. ამ დროს ხდება მონეტების გაგზავნა ისეთ მისამართზე, საიდანაც მათი დახარჯვა შეუძლებელი ხდება. ტოკენების განბლოკვა, ვესტინგის გრაფიკები და
სტეიკინგი ასევე გავლენას ახდენს კონკრეტულ მომენტში ბაზარზე მონეტების ფაქტობრივად ხელმისაწვდომ რაოდენობაზე.
ცირკულირებადი მარაგი ძირითადად გამოიყენება კრიპტოვალუტის
საბაზრო კაპიტალიზაციის გამოთვლისთვის. საბაზრო კაპიტალიზაციის დაანგარიშებისთვის მონეტის მიმდინარე საბაზრო ფასი უნდა გავამრავლოთ მიმოქცევაში არსებული მონეტების რაოდენობაზე. მაგალითად, თუ კრიპტოვალუტის ცირკულირებადი მარაგი არის 1 000 000 მონეტა და თითოეული მონეტის საბაზრო ფასია 5,00 აშშ დოლარი, მისი საბაზრო კაპიტალიზაცია იქნება 5 000 000 აშშ დოლარი.
რადგან საბაზრო კაპიტალიზაცია დამოკიდებულია ცირკულირებად მარაგზე და არა საერთო მარაგზე ან მაქსიმალურ მარაგზე, ორ პროექტს, რომელთა ტოკენებსაც მსგავსი ფასი აქვს, შეიძლება სრულიად განსხვავებული ღირებულება ჰქონდეს. მარაგების მაჩვენებლების ცოდნა მნიშვნელოვანია, თუ თქვენ იკვლევთ პროექტის
ტოკენომიკას. ეს გეხმარებათ აქტივების ერთმანეთთან შედარებაში, რაც გაგიმარტივებთ სწორი დასკვნების გამოტანას.