მთავარი დეტალები
„ინტერნეტ-კაპიტალის ბაზრები“ წარმოადგენს ციფრულ აქტივებს, რომლებიც ნებისმიერ ადამიანს აძლევს ფინანსების მოზიდვის ან კაპიტალის ინვესტირების შესაძლებლობას ბლოკჩეინის მეშვეობით, ტრადიციული საბანკო სისტემის ან ვენჩურული კაპიტალის მეთოდების საჭიროების გარეშე.
ICM პლატფორმები ავტორებს სთავაზობს ტოკენების სულ რამდენიმე წამში გაშვების შესაძლებლობას, მომხმარებელს კი აძლევს ახალ პროექტებზე ადრეული წვდომის საშუალებას.
მიუხედავად იმისა, რომ ისინი ახალ შესაძლებლობებს გვთავაზობს, მათთან დაკავშირებულია გარკვეული რისკები, როგორიცაა თაღლითობები, არასტაბილურობა და რეგულაციების არარსებობა.
შესავალი
წარმოიდგინეთ, რომ სტარტაპის გასაშვებად საჭირო იყოს მხოლოდ სოციალურ ქსელში პოსტის გამოქვეყნება და მთელი მსოფლიოდან ფინანსების მოზიდვის დაწყება. სწორე ამ მიზნით შეიქმნა ICM-ები და ICM ტოკენები. ICM-ები ამარტივებს იდეების ბლოკჩეინზე განთავსებულ ციფრულ აქტივებად გარდაქმნის პროცესს.
ტრადიციული მეთოდებით ფინანსების მოზიდვა ძალიან რთულია
ბიზნესის დაწყება ძალიან ძნელია, განსაკუთრებით როდესაც საქმე ფინანსების მოძიებას ეხება. მაშინაც კი, როდესაც დამფუძნებელი ახერხებს ვენჩურულ ინვესტორებთან (VC) შეხვედრის ორგანიზებას, ეს პროცესი ნელი, კონკურენტული და დაბრკოლებებით სავსეა. ზოგ რეგიონში შეიძლება არ გქონდეთ სტარტაპების ადრეულ ეტაპებზე ინვესტირების უფლება ან მოგიწიოთ რეგულაციებით გამოწვეული დაბრკოლებების გადალახვა, რომლებიც უპირატესობას აკრედიტებულ ინვესტორებს ანიჭებს.
როგორ მუშაობს „ინტერნეტ-კაპიტალის ბაზრები“
ახალი იდეებისთვის ფინანსების მოზიდვის ან მათში ინვესტირების გასამარტივებლად, ICM-ები იყენებს ბლოკჩეინს. ვენჩურული კაპიტალის ფირმებთან კავშირების დამყარების ან სპეციალური ინვესტორის სტატუსის მოპოვების ნაცვლად, თქვენ შეგიძლიათ გამოუშვათ ტოკენი პირდაპირ სოციალურ ქსელში პოსტის გამოქვეყნების მეშვეობით. ამასთანავე, პროგრამირების ცოდნა საჭირო არ არის. ICM პლატფორმები ავტომატურად წარმართავენ მთელს პროცესს: პოსტის გამოქვეყნებისთანავე ბოტი ამზადებს ტოკენს, ირჩევს ფასის განსაზღვრის დინამიურ მოდელს, რაც დაფუძნებულია მოთხოვნაზე (იხილეთ დამაკავშირებელი მრუდი) და ანაწილებს ტოკენებს ადრეულ მხარდამჭერებს შორის.
ეს მოდელი იყენებს ტრადიციული კაპიტალის ბაზრების მუშაობის პრინციპებს, თუმცა ეს ყველაფერი ბლოკჩეინზე ხორციელდება, რისი წყალობითაც პროცესი უფრო სწრაფი და მარტივია და ხელმისაწვდომია ინტერნეტ-კავშირის და კრიპტო საფულის მქონე ყველა ადამიანისთვის.
რა არის „ინტერნეტ-კაპიტალის ბაზრების“ (ICM) ტოკენები?
ICM ტოკენები წარმოადგენს ციფრულ აქტივებს, რომლებიც გაძლევთ პროექტის ადრეულ ეტაპზე მონაწილეობის შესაძლებლობას. იმის მიხედვით, თუ როგორ არის ტოკენი მოწყობილი, ის შეიძლება გაძლევდეთ პროექტის განვითარებასთან დაკავშირებული გადაწყვეტილების მიღებაში (ხმის მიცემის მეშვეობით) მონაწილეობის უფლებას, ფუნქციებზე ან კონტენტზე ადრეული წვდომის, ასევე სამომავლო მოგებიდან წილის მიღების შესაძლებლობას.
თუმცა, ICM ტოკენების ფლობა არ არის კომპანიის აქციების ფლობის ანალოგიური. თქვენ არ იღებთ წილის ფლობის უფლებას. ამის ნაცვლად, თქვენ იღებთ პროგრამული კოდით განსაზღვრულ და მისი მხარდამჭერი საზოგადოების მიერ ფორმირებულ აქტივს. მიუხედავად იმისა, რომ ICM-ები გვთავაზობს მეტ მოქნილობას და იდეების ინტერნეტის მეშვეობით მხარდაჭერის და გაზიარების შესაძლებლობას, აუცილებელია იცოდეთ მასთან დაკავშირებული რისკების შესახებ.
ICM ტოკენების დადებითი და უარყოფითი მხარეები
დადებითი მხარეები
1. ყველასთვის ხელმისაწვდომია: არ არის საჭირო აკრედიტებული ინვესტორის სტატუსი—ნებისმიერ პირს, რომელსაც აქვს Web3 საფულე, შეუძლია მონაწილეობის მიღება. ICM-ები აქრობს ტრადიციულ ბარიერებს და ადრეულ ეტაპზე ინვესტირებას უფრო ინკლუზიურს ხდის.
2. 24/7: არ არის საჭირო საფონდო ბირჟების გახსნის საათების ლოდინი. ICM ტოკენების ყიდვა ან გაყიდვა ნებისმიერ დროს, ნებისმიერი ადგილიდან შეგიძლიათ, რადგან ისინი საჯარო ბლოკჩეინებზეა განთავსებული.
3. ფინანსების მოზიდვის გამარტივებული პროცესი: ტოკენის გამოშვება ისეთივე მარტივია, როგორც სოციალურ ქსელში პოსტის გამოქვეყნება. პროექტებისთვის კაპიტალის მოზიდვა სწრაფად ხდება, რისი წყალობითაც იდეების რეალიზაციას თვეები არ სჭირდება.
4. ზრდის პოტენციალი: სოციალურ ქსელში ინტეგრირების წყალობით, ამ ტოკენების პოპულარიზაცია და მათი მეშვეობით ინტერნეტ-პროექტების მხარდაჭერა ძალიან მარტივია.
უარყოფითი მხარეები
1. რეგულაციების არარსებობა: ტრადიციული ფინანსური ბაზრებისგან განსხვავებით, ICM პლატფორმები არ არის დაცული რეგულაციებით. ეს იმას ნიშნავს, რომ შესაძლოა გადააწყდეთ შეუმოწმებელ ან შეცდომაში შემყვან პროექტებს. ამის გამო შესაძლოა თაღლითობების, ყალბი პროექტების და rug pull-ების მსხვერპლი გახდეთ.
2. არასტაბილურობა: ICM ტოკენების ფასები შეიძლება სწრაფად და მოულოდნელად შეიცვალოს, ზოგჯერ მათი ფასი ერთ დღეში 50%-ზე მეტით ეცემა. ფასების მსგავსი მერყეობა ხშირად გამოწვეულია მომხმარებელთა განწყობით ან ონლაინ ტრენდებით და არა ფუნდამენტური ასპექტებით.
3. უსაფრთხოება: კრიპტო საფულეები და მომხმარებლები მუდმივად ხდებიან ჰაკერების და თაღლითების სამიზნეები. მძლავრი უსაფრთხოების სისტემის და პირადი გასაღებების მართვის პრაქტიკის გარეშე შეიძლება დაკარგოთ თქვენი თანხები. ასევე არსებობს ექსპლოიტების და ბაგების რისკი, თუ სმარტ კონტრაქტები სწორად არ არის შედგენილი.
შეჯამება
ICM ტოკენები ნებისმიერ ადამიანს სთავაზობს ინვესტირების შესაძლებლობას. თუ იდეები გაქვთ, ტოკენის გამოშვება რამდენიმე წუთში შეგიძლიათ. თუ პროექტის მხარდამჭერი ხართ, ინვესტირებისთვის მხოლოდ საფულე გესაჭიროებათ. მიუხედავად ყველაფრისა, „ინტერნეტ-კაპიტალის ბაზრები“ რისკიანი, არარეგულირებული აქტივებია და მათი ღირებულება ხშირად მომხმარებლის განწყობაზეა დამოკიდებული. ყოველთვის საფუძვლიანად შეისწავლეთ პროექტი და გამოიყენეთ მხოლოდ ის სახსრები, რომელთა დაკარგვაც დიდად არ დაგაზარალებთ.
დამატებითი საკითხავი
პასუხისმგებლობაზე უარის განაცხადი: ეს კონტენტი თქვენთვის მოწოდებულია „არსებული სახით“ და განკუთვნილია მხოლოდ ზოგადი საინფორმაციო და საგანმანათლებლო მიზნებისთვის, რაიმე სახის რეპრეზენტაციისა თუ გარანტიის გარეშე. იგი არ უნდა იქნეს აღქმული, როგორც ფინანსური, იურიდიული ან პროფესიული რჩევა და არ არის განკუთვნილი იმისთვის, რომ რეკომენდაცია გაუწიოს რაიმე სახის კონკრეტული პროდუქტის ან სერვისის შეძენას. რჩევის მისაღებად უნდა მიმართოთ შესაბამის პროფესიონალ მრჩეველს. რადგან წინამდებარე სტატია მოწოდებულია მესამე მხარის მიერ, გაითვალისწინეთ, რომ მასში წარმოდგენილი შეხედულებები ეკუთვნის მესამე მხარეს და არ წარმოადგენს Binance Academy-ს შეხედულებებს. დამატებითი ინფორმაციის მისაღებად, სრულად გაეცანით აქ წარმოდგენილ პასუხისმგებლობაზე უარის განაცხადს. ციფრული აქტივების ფასები შეიძლება იყოს არასტაბილური. თქვენი ინვესტიციის ღირებულებამ შეიძლება დაიკლოს ან მოიმატოს და შესაძლოა ვერ შეძლოთ ინვესტირებული თანხის დაბრუნება. თქვენ ერთპიროვნულად ხართ პასუხისმგებელი თქვენს საინვესტიციო გადაწყვეტილებებზე და Binance Academy არ არის პასუხისმგებელი თქვენ მიერ განცდილ არანაირ ზარალზე. ეს მასალა არ უნდა იქნეს აღქმული, როგორც რაიმე სახის ფინანსური, იურიდიული, ან პროფესიული რჩევა. დამატებითი ინფორმაციის მისაღებად, გაეცანით ჩვენს გამოყენების პირობებს და რისკის შესახებ გაფრთხილებას.