Ano ang Litecoin (LTC)?

TL;DR

Ang Litecoin (LTC) ay isang altcoin na binuo noong 2011 ng dating engineer ng Google na si Charlie Lee. Nilayon nitong maging lite na bersyon ng Bitcoin na nagbibigay-daan sa mga halos agaran at murang pagbabayad. Ginamit ng Litecoin ang code at ilang partikular na feature ng Bitcoin sa blockchain nito, pero binibigyan nito ng priyoridad ang bilis ng pagkumpirma ng transaksyon para magkaroon ng mas mataas na transaksyon bawat segundo (transaction per second o TPS) at mas mabilis na pagbuo ng block.

Dahil sa pagkakatulad nito sa Bitcoin, ginamit ang blockchain ng Litecoin bilang testing ground kung saan mapag-eeksperimentuhan ng mga developer ang mga teknolohiyang gusto nilang ipatupad sa Bitcoin. Hailmbawa, pinatakbo ang Segregated Witness (SegWit) at Lightning Network sa blockchain ng Litecoin bago sa Bitcoin.

May kabuuang supply na 84 na milyon ang Litecoin. Katulad ng Bitcoin, deflationary ito at nakakalahati ito bawat 840,000 block (humigit-kumulang bawat 4 na taon). Inaasahang mangyayari ang susunod na halving sa Agosto 2023. Mabibili ang Litecoin sa iba't ibang palitan ng cryptocurrency, kasama na ang Binance.

Panimula

Ang Litecoin (LTC) ay isa sa mga pinakaluma sa lahat ng altcoin sa merkado. Noong una itong ipinakilala noong 2011, binansagan ang Litecoin bilang “pilak sa ginto ng bitcoin” dahil pangunahing nakabatay ang blockchain nito sa code ng Bitcoin. Bagama't itinuturing ng ilang mamumuhunan sa crypto ang Bitcoin bilang magandang store of value, kadalasang itinuturing ang Litecoin bilang mas magandang opsyon para sa mga peer-to-peer na pagbabayad dahil sa mas mabilis na pagkumpirma at mas mabababang bayarin nito.

Isa ang Litecoin (LTC) sa mga unang altcoin. Ginawa ito ng dating engineer ng Google na si Charlie Lee noong 2011, at binuo ang blockchain nito batay sa mga open-source code ng Bitcoin. Pero naglagay ang Litecoin ng ilang partikular na pagbabago, gaya ng mas mabilis na rate ng pagbuo ng block at ibang algorithm ng pagmimina ng Proof of Work (PoW) na tinatawag na Scrypt.

May limitadong kabuuang supply na 84 na milyon ang Litecoin. Katulad ng Bitcoin, makukuha ang Litecoin sa pagmimina at mayroon itong mekanismo ng halving na nangyayari bawat 840,000 block (humigit-kumulang 4 na taon). Noong Agosto 2019 ang huling halving ng LTC, kung saan nakalahati ang mga block reward mula 25 LTC at naging 12.5 LTC. Inaasahang mangyayari ang susunod na halving sa Agosto 2023.

Paano gumagana ang Litecoin?

Bilang binagong bersyon ng Bitcoin, idinisenyo ang Litecoin para magbigay-daan sa mga mas mura at mas mahusay na transaksyon kaysa sa network ng Bitcoin. Gaya ng Bitcoin, ginagamit ng Litecoin ang mekanismo ng Proof of Work para magbigay-daan sa mga minero na makakuha ng mga bagong coin sa pamamagitan ng pagdaragdag ng mga bagong block sa blockchain nito. Gayunpaman, hindi ginagamit ng Litecoin ang SHA-256 algorithm ng Bitcoin. Sa halip, gumagamit ang LTC ng Scrypt, isang algorithm sa pag-hash na makakabuo ng mga bagong block humigit-kumulang bawat 2.5 minuto, habang inaabot nang 10 minuto sa average ang pagkumpirma ng block ng Bitcoin.

Unang binuo ang Scrypt ng development team ng Litecoin para mapaunlad ang sarili nitong ecosystem ng desentralisadong pagmimina nang hiwalay sa system ng Bitcoin at mas mapahirap ang pag-atakeng 51% sa LTC. Noong umpisa, nagbigay-daan ang Scrypt sa mas madaling ma-access na pagmimina para sa mga gumagamit ng mga tradisyonal na GPU at CPU card. Ang layunin ay pigilan ang mga minerong ASIC na mamayani sa pagmimina ng LTC. Gayunpaman, bumuo rin ng mga minerong ASIC para mas mahusay na makapagmina ng LTC, kaya naman inihinto na ang pagmimina gamit ang GPU at CPU.

Dahil medyo magkatulad ang Bitcoin at Litecoin, madalas na ginamit ang Litecoin bilang “testing ground” kung saan mapag-eeksperimentuhan ng mga developer ang mga teknolohiya ng blockchain na gagamitin sa Bitcoin. Halilmbawa, ginamit ang Segregated Witness (SegWit) sa Litecoin bago sa Bitcoin noong 2017. Ang SegWit, na iminungkahi para sa Bitcoin noong 2015, ay naglalayong i-scale ang blockchain sa pamamagitan ng paghihiwalay ng digital signature mula sa bawat transaksyon para magamit nang mas mabuti ang limitadong espasyo sa isang block. Nagbigay-daan ito para makapagproseso ang mga blockchain ng mas maraming transaksyon kada segundo (transactions per second o TPS).

Isa pang solusyon sa pag-scale, ang Lightning Network, ang ipinatupad sa Litecoin bago sa Bitcoin. Isa ang Lightning Network sa mga pangunahing bahaging mas nagpapahusay sa mga transaksyon sa Litecoin. Isa itong layer 2 protocol na ginawa bilang dagdag sa blockchain ng Litecoin. Binubuo ito ng mga micropayment channel na ginawa ng mga user, na nagbibigay-daan sa mas mabababang bayarin sa transaksyon.

Bukod pa rito, layunin ng Litecoin na lutasin ang problema sa privacy ng transaksyon sa pamamagitan ng paggamit ng protocol na nakatuon sa privacy na tinatawag na MimbleWimble Extension Block (MWEB). Ipinangalan dito ang nakakabulol na spell mula sa mga libro ng Harry Potter, na pumipigil sa biktima na maglahad ng impormasyon. Katulad ng spell, nagbibigay-daan ang MimbleWimble para manatiling ganap na anonymous ang impormasyon ng transaksyon, kasama na ang mga address ng nagpadala at nakatanggap at ang halaga ng crypto na ipinadala. Kasabay nito, inaalis din ng MWEB ang hindi kinakailangang impormasyon ng transaksyon, at mas compact at nababago ang mga laki ng block. Mula Disyembre 2021, dine-develop pa ang protocol ng MWEB ng Litecoin.

Mga Mapaggagamitan ng Litecoin

Bilang isa sa mga unang altcoin, pinahusay ng Litecoin ang code ng Bitcoin para madagdagan ang scalability nito para sa mas mabibilis na transaksyon at mas mabababang bayarin. Bagama't hindi nito kayang makipagsabayan as Bitcoin pagdating sa market cap, may kumpetitibong bentahe ito bilang system ng peer-to-peer na pagbabayad. Sa katunayan, inanunsyo ng Litecoin Foundation noong Nobyembre 2021 na puwedeng gamitin ang LTC bilang paraan ng pagbabayad gamit ang Litecoin VISA debit card sa pamamagitan ng pag-convert ng LTC sa USD nang real-time. Bukod pa rito, idinagdag ng ilang partikular na negosyo ang Litecoin bilang paraan ng pagbabayad, mula sa mga kumpanya ng paglalakbay, convenience store, ahensya ng ari-arian, at online na tindahan.

Isa pang dapat tandaan ang pinakaaabangang release ng MimbleWimble sa network ng Litecoin. Hindi lang kayang palabuin ng MimbleWimble ang mga address ng wallet sa isang transaksyon, posibleng madoble rin nito ang TPS ng Litecoin. Kung matagumpay itong maipapatupad, mas mapapaigting pa ng upgrade ang privacy at fungibility ng mga transaksyon ng LTC. Gayunpaman, walang nakatakdang petsa ng release sa mainnet mula Disyembre 2021.

Paano bumili ng Litecoin sa Binance?

Puwede kang bumili ng Litecoin sa mga palitan ng crypto gaya ng Binance.

1. Mag-log in sa iyong account sa Binance at pumunta sa [Mag-trade]. Piliin ang [Classic] o [Advanced] na mode ng pag-trade para magsimula. Sa tutorial na ito, [Classic] ang pipiliin natin.

2. Susunod, i-type ang “LTC” sa search bar para makakita ng listahan ng mga available na pares sa pag-trade sa Binance. LTC/BUSD ang gagamitin natin bilang halimbawa.

3. Sa ilalim ng [Spot], piliin ang uri ng order at ilagay ang halagang bibilhin. I-click ang [Bumili ng LTC] para ilagay ang order, at makikita mo ang nabiling LTC sa iyong Spot Wallet.

Mga pangwakas na pananaw

Nagpakita ang Litecoin ng tuloy-tuloy na pagsisikap na umunlad para maging “pilak sa ginto ng bitcoin” mula nang lumabas ito noong 2011. Bagama't hindi ito kasingsikat ng Bitcoin o Ethereum (ETH) pagdating sa market capitalization, inaasahan ng komunidad ng Litecoin na magkakaroon pa ng pag-unlad na makakapagbigay ng mga pinahusay na feature at mapaggagamitan.