Hashed TimeLock Contract (HTLC)

Mahir
Update shuda Aug 28, 2026

Hashed TimeLock Contract kia hai?

Hashed TimeLock Contract (HTLC) smart contract ke feature ki ek aisi qisam hai, jo do parties ke darmiyan waqt ke sath makhsoos aur sharaait par mabni adaigiyan tay karne ke liye istemal hoti hai. Is ka sab se aam istemal payment channels mein hota hai, jahan yeh kisi intermediary par aitemad kiye baghair funds ki muntaqili ko mumkin banati hai.

Amli tor par, HTLC transaction ke recipient ko makhsoos timeframe ke andar ek cryptographic proof jama karwa kar adaigi ki tasdeeq karna hoti hai, jo blocks ki tadaad se measure ki jati hai. Agar recipient barwaqt tor par adaigi ka da'wa nahi karta, to funds khud kaar tor par original sender ke pas wapis chale jate hain.

HTLC kaise kaam karta hai?

HTLC do mukhtalif functions ko yakja karta hai jo mil kar payment ko mashroot aur time-limited donon banate hain:

  • Hashlock: ek aisi shart jo us waqt tak funds kharch karne se rokti hai jab tak makhsoos maloomat zahir na kar di jayein. In maloomat ko pre-image kaha jata hai, jo woh asal input hoti hai jise hashing ke zariye hashlock generate karne ke liye istemal kiya jata hai. Pre-image ko zahir karna us cryptographic proof ke tor par kaam karta hai jo funds ko unlock karne ke liye darkar hota hai.
  • Timelock: aik aisi shart jo funds ko mustaqbil mein ek makhsoos waqt ya block height tak kharch honay se rokti hi. Bitcoin par, isay CheckLockTimeVerify ya CheckSequenceVerify jaise opcodes ka istemal kar ke nafiz kiya ja sakta hai.

Ek sath, in donon functions ka matlab hai keh payment sirf usi soorat mein mukammal ho sakti hai keh agar recipient timelock expire hone se pehle durust pre-image zahir kare. Agar wo aisa nahi karte, to sender funds par dubara da'wa kar sakta hai. Yeh design muta'adad marahil par mabni ya routed payments mein intermediaries par aitimad karne ki zarurat khatam kar deta hai.

HTLCs ke Istemal ki Sooratein kia hain?

Bitcoin ka Lightning Network HTLCs ke istemal kI numayan tareen sooraton mein se ek hai. Payment channels par HTLCs apply kar keh, funds interconnected channels ke zariye ek user se dusre user ko muntaqil kiye ja sakte hain, aur is mein kisi bhi party ko dusron par aitmad karne ki zarurat nahi hoti. Is process ko network routing kaha jata hai.

Misal ke tor par, farz karein Alice, Carol ko adaigi karna chahti hai, lekin us ka Carol ke sath koi barah e raast channel mojood nahi hai. HTLCs ke zariye, Alice apni payment Bob jaise kisi connected participant ke zariye bhej sakti hai. Hashlock aur Timelock ki sharaait is baat ko yaqeeni banati hain ke Bob na to funds rok sakta hai aur na hi apne paas rakh sakta hai: woh sirf tay shudah sharaait ke mutabiq payment aagay muntaqil kar sakta hai, ba soorat e deegar funds wapas Alice ke pas chalay jayein ge.

Lightning Network ke ilawa, HTLCs ko atomic swaps mein bhi istemal kiya jata hai, jo do parties ko kisi central intermediary ke baghair mukhtalif blockchains ke darmiyan assets exchange karne ki sahulat dete hain. Isi wajah se HTLCs ko cross-chain interoperability ke liye ek eham bunyadi building block samjha jata hai. Deegar applications mein financial smart contracts aur escrow arrangements shamil hain, jahan sharaait aur makhsoos waqt par mabni settlement mufeed sabit ho sakti hai.
Mazeed jaanein: Smart Contracts kia hain aur ye kaise kaam karte hain?
Posts share karein
Mutaliqa Glossaries
Atomic Swap

Smart contract technology jo exchanges jaise markazi fareeqain ke baghair ek cryptocurrency ko dusri crypto...

Hash Rate

Woh raftar jis ke sath ek computer naye hashes ka hisab karne ke qabil hota hai.

Binance Academy Editorial

Editorial Team
Editorial Policy
Account register karein
Aaj hi Binance ka account khol kar apnay ilm ka amli tor par istemal karein