Əsas diqqət yetiriləcək məqamlar
Internet Computer (ICP) bulud hesablama gücünü mərkəzdənkənar şəkildə ictimai internetə gətirən blokçeyn şəbəkəsidir.
Bu, tərtibatçılara ənənəvi proqram təminatı kimi işləyən, smart müqavilələrə əsaslanan tətbiqlər yaratmağa və işə salmağa imkan verir.
ICP tokenləri qərarlarda səsvermə, komissiyaların ödənilməsi və şəbəkənin icra edilməsini təmin edən şəxslərin mükafatlandırılması üçün istifadə olunur.
Layihə etibara əsaslanmayan və miqyaslana bilən alternativ təqdim etməklə mərkəzləşdirilmiş bulud xidmət təminatçıları ilə rəqabət aparmağı hədəfləyir.
Giriş
Internet Computer (ICP) internet xidmətlərinin və proqram təminatının qurulma və yerləşdirilmə qaydasını dəyişdirmək üçün yaradılmış blokçeyndir. Ənənəvi mərkəzləşdirilmiş serverlərdən istifadə etmək əvəzinə, ICP tətbiqlərin internetdə fəaliyyəti üçün daha açıq və mərkəzdənkənar üsul təklif edir. 2016-cı ildə DFINITY Fondu tərəfindən yaradılan və 2021-ci ildə istifadəyə verilən ICP qlobal data mərkəzlərini birləşdirərək mərkəzdənkənar bulud yaradır.
Internet Computer (ICP) nədir?
ICP bulud hesablama funksionallığını internetə gətirən açıq blokçeyndir. Bu, mərkəzdənkənar idarəetməni, miqyaslana bilən smart müqavilələri və müstəqil operatorlara məxsus avadanlıqları birləşdirir. ICP proqram təminatının smart müqavilələr kimi icra olunmasına imkan verir, habelə Amazon Web Services və ya Google Cloud kimi ənənəvi bulud xidmətlərinə alternativ təqdim edir.
Məqsəd smart müqavilələri ənənəvi proqram təminatı qədər güclü və çevik hala gətirməkdir. Beləliklə, onlar mürəkkəb tapşırıqları yerinə yetirə, veb-saytlar təqdim edə və adi veb-brauzerlər vasitəsilə istifadəçilərlə ünsiyyət qura bilərlər. Bu ayarlama sayəsində tərtibatçılar mərkəzləşdirilmiş infrastrukturdan asılı olmayan, tamamilə blokçeyn əsasında işləyən tətbiqlər yarada bilərlər və bu da şəffaflığı və təhlükəsizliyi artırmağa kömək edir.
Internet Computer-in iş prinsipi necədir?
Mərkəzdənkənar aparat təminatı
Internet Computer bir çox müstəqil qrupa məxsus olan və onlar tərəfindən idarə olunan avadanlıq təminatı qovşaqları üzərində işləyir. Bu o deməkdir ki, o, iri texnologiya şirkətlərindən və ya mərkəzləşdirilmiş serverlərdən asılı deyil, bu isə senzura və ya kəsintilər kimi riskləri azaldır. Hər qovşaq hesablama resursları təmin edir və birlikdə paylanmış bulud şəbəkəsini təşkil edirlər.
Güclü smart müqavilələr
ICP-dəki smart müqavilələr "kanistr" adlanır və böyük həcmdə data saxlaya, həmçinin bulud proqram təminatı kimi miqyaslana bilərlər. Onlar bir çox tapşırığı eyni anda icra edə bilirlər və bu da şəbəkənin çoxlu tranzaksiyaları eyni vaxtda, səmərəliliyi pozmadan emal etməsini təmin edir.
Unikal komissiya sistemi
İstifadəçilər hər dəfə tətbiqdən istifadə etdikdə komissiya ödəmək əvəzinə, tərtibatçılar layihələrini hesablama xərclərini ödəmək üçün əvvəlcədən ödənilmiş "dövrələr" ilə təmin edirlər. Bu, istifadəçilərə xüsusi pul kisəsi və ya tokenlərə ehtiyac olmadan tətbiqlərə adi veb-brauzerlər vasitəsilə asanlıqla daxil olmağa imkan verir.
Bağlantı
ICP HTTP kimi ümumi veb-protokollardan istifadə edərək digər blokçeynlər və ənənəvi internet saytları ilə əlaqə qurub kommunikasiya yarada bilər. Məsələn, o, ICP sistemində fəaliyyət göstərən və bitcoin ilə dəstəklənən token olan zəncir-açar Bitcoin-i (ckBTC) dəstəkləyir. Ethereum və digər blokçeynlərlə oxşar inteqrasiyalar da yaradılma mərhələsindədir.
İcma
ICP Network Nervous System (NNS) adlanan sistem tərəfindən idarə olunur. Bu sistem şəbəkənin mərkəzi səlahiyyət olmadan özünü yeniləməsinə və təkmilləşdirməsinə imkan verən mərkəzdənkənar idarəetmə quruluşudur. Şəbəkə həmçinin kiçik altşəbəkələr əlavə etməklə böyüyə bilər və bu, iş yükünün bölüşdürülməsinə kömək edir.
ICP-də nə yarada bilərsiniz?
Tərtibatçılar ICP-də biznes proqram təminatı, mərkəzdənkənar söhbət tətbiqləri, Web3 sosial media platformaları və DeFi məhsulları daxil olmaqla müxtəlif növ tətbiqlər və xidmətlər yarada bilərlər.
Platforma bir neçə proqramlaşdırma dilini (məsələn, Rust və Python), eləcə də DFINITY tərəfindən yaradılmış Motoko proqramlaşdırma dilini dəstəkləyir. Bu, ənənəvi proqram təminatı mühitindən keçən tərtibatçılar üçün maneələri azaldır.
Məhdudiyyətlər
Internet Computer-də qovşaqları icra etmək güclü avadanlıq təminatı tələb edir. Bu, iştirakçıları məhdudlaşdıra və şəbəkənin həqiqətən nə qədər mərkəzdənkənar olduğuna təsir edə bilər. Həmçinin məzmunu idarə edən mərkəzi şirkət olmadığına görə zərərli və ya sui-istifadə olunan materialın necə idarə olunacağını müəyyənləşdirmək çətin ola bilər.
Digər bir çətinlik qəbul edilmə məsələsidir: ICP güclü vasitələr təqdim etsə də, tərtibatçıları və biznesləri AWS və ya Google Cloud kimi tanış mərkəzləşdirilmiş xidmətlərdən uzaqlaşdırmaq zaman tələb edə bilər.
ICP internetin iş prinsipini dəyişməyə çalışan yeganə layihə deyil. IPFS/Filecoin və Solid (veb-ixtiraçı Tim Berners-Lee tərəfindən) kimi digər layihələr də alternativ internet texnologiyaları üzərində işləyirlər.
Yekun qeydlər
Internet Computer interneti daha açıq, təhlükəsiz və mərkəzdənkənar hala gətirmək vasitəsilə dəyişməyi hədəfləyir. ICP təkmil smart müqavilələri, mərkəzdənkənar avadanlıq təminatını və icma idarəçiliyini birləşdirərək tətbiqləri və xidmətləri onlayn yerləşdirməyin yeni yolunu təqdim edir.
Həll edilməli çətinliklər, xüsusilə açıqlıq və idarəetmə məsələləri olsa da, ICP gələcəkdə veb-xidmətlərdən istifadə və onlarla kommunikasiya tərzimizi dəyişmək potensialına malikdir. Uğur qazanarsa, bu, texnologiya nəhənglərindən asılılığı azalda, tərtibatçılar üçün yeni imkanlar yarada və istifadəçilərə rəqəmsal data üzərində daha çox nəzarət təqdim edə bilər.
Tövsiyə olunan ədəbiyyat
Məsuliyyətdən imtina: Bu məzmun sizə ümumi məlumat və maarifləndirmə məqsədilə hər hansı bir təqdimat və ya zəmanət olmadan hazırkı məlumatlar əsasında təqdim edilir. Bu, maliyyə, qanuni və ya digər peşəkar məsləhət kimi qəbul edilməməlidir, bu məlumatlar hər hansı konkret məhsulun və ya xidmətin satın alınmasını tövsiyə etmək məqsədi daşımır. Siz məsləhəti müvafiq peşəkar məsləhətçilərdən almalısınız. Məqaləni üçüncü tərəf təqdim etdiyi zaman ifadə edilən fikirlərin üçüncü tərəfə aid olduğunu nəzərə alın və bunları Binance Academy tərəfindən verilən tövsiyə kimi qəbul etməyin. Əlavə təfərrüatlar üçün məsuliyyətdən imtina bölməsini tam şəkildə burada oxuyun. Rəqəmsal aktiv qiymətləri dəyişkən ola bilər. İnvestisiyanızın dəyəri aşağı düşə və ya yuxarı qalxa bilər, investisiya qoyduğunuz məbləği geri almaya bilərsiniz. İnvestisiya qərarlarınıza görə yalnız özünüz məsuliyyət daşıyırsınız və Binance Academy baş verə biləcək itkilərə görə heç bir məsuliyyət qəbul etmir. Bu material maliyyə, qanuni və ya digər peşəkar məsləhət kimi qəbul edilməməlidir. Ətraflı məlumat üçün İstifadə qaydası və Risk xəbərdarlığı bölməmizə baxın.