Негизги жыйынтыктар
Ethereum Fusaka жаңыртуусу негизги тармакта 2025-жылдын 3-декабрында ишке киргизилиши күтүлүүдө.
Fusaka блоктун транзакция чегин 45 миллиондан 150 миллионго чейин жогорулатат жана PeerDAS менен Verkle Trees сыяктуу жаңы маалыматтарды башкаруу ыкмаларын киргизет.
Жаңыртуунун максаты – борбордон ажыратуу жана коопсуздукту сактоо менен бирге Ethereum'дун мүмкүнчүлүктөрүн кеңейтүү.
Негизги тармакка ишке киргизилгенге чейин бир нече сынама блокчейн тармагынын фазаларынан (Holesky, Sepolia, Hoodi) өтөт.
Ишке киргизилгенге чейин, $2 миллион чейин сыйлык менен төрт жумалык мүчүлүштүктөрдү аныктоо үчүн сыйлык өнөктүгү өтөт.
Киришүү
Ethereum тезирээк жана колдонууга оңой болушу үчүн жакшыртуулардын үстүндө тынымсыз иштеп жатат. Fusaka жаңыртуусу тармакка көбүрөөк транзакцияларды иштетүүгө жана майнаптуу иштөөгө жардам берүүнү көздөгөн жаңыртуулардын бири болуп саналат.
2025-жылдын аягына чейин ишке ашуусу күтүлүп жаткан Fusaka транзакция чегин жогорулатып эле койбостон, маалыматтарды башкаруунун акылдуу ыкмаларын да киргизет. Келиңиз, Ethereum Fusaka жаңыртуусу деген эмне экенин, эмне үчүн маанилүү экенин жана андан ары эмнени күтүү керектигин карап көрөлү.
Ethereum Fusaka жаңыртуусу деген эмне?
Fusaka жаңыртуусу Ethereum'дун транзакция өткөрүмдүүлүгүн кеңейтүү үчүн иштелип чыккан ири тармактык жаңыртуу болуп, ал блоктун транзакция чегин 45 миллиондон 150 миллионго чейин жогорулатат. Бул тармак жаңы блок кошулган сайын көбүрөөк транзакцияларды, акылдуу келишимдерди жана башка операцияларды иштете алат дегенди билдирет.
Бирок Fusaka жөн гана сандын өсүшү эмес. Ал эки маанилүү техникалык жакшыртуу менен келет:
Peer Data Availability Sampling (PeerDAS): Валидаторлор эми толук blob'дорун жүктөп алуунун ордуна, ар кандай булактардан чакан маалымат бөлүктөрүн гана текшере алышат. Бул алардын маалыматтар жеткиликтүү жана жарактуу экенин ырастоо ыкмасын өзгөртөт.
Verkle Trees: бул блокчейн маалыматтарын уюштуруунун өзгөчө ыкмасы. Verkle Trees маалымат далилдерин кичирээк бөлүктөргө кысуу аркылуу аларды текшерүүнү жеңил жана ылдам кылат.
Бул өзгөртүүлөрдүн баары биригип, Ethereum тармагын масштабдуураак кылат, бирок тармакты иштеткен түйүн операторлоруна өтө чоң жүк жаратпайт.
Эмне үчүн Fusaka жаңыртуусу маанилүү
Ethereum жылдар бою абдан өстү, миллиондогон колдонуучулар DeFi протоколдору, алмаштырылгыс уникалдуу токен (NFT), борбордон ажыратылган колдонмолор жана 2-катмардагы чечимдери менен өз ара аракеттенишип келишет. Бирок жүктөм көп болгон учурларда тармактын тыгындары пайда болуп, транзакцияларды ырастоо жайлап, акылар жогорулап кетиши мүмкүн.
Fusaka бул көйгөйлөрдү мындайча төмөндөтүүгө багытталган:
Ар бир блокко көбүрөөк транзакция жана татаал операцияларды камтууга мүмкүндүк берет (блок өлчөмүн көбөйтөт);
Маалыматтарды бөлүшүү жана текшерүү ыкмасын өркүндөтүп, айрыкча транзакция маалыматтарын жайгаштыруу үчүн колдонулган маалымат форматы болгон blob'дорго таянган 2-катмардагы платформалары үчүн пайдалуу.
Тармакты борбордон ажыратып жана коопсуз сактоо, анын ар ким үчүн ачык жана адилеттүү болушун камсыз кылат.
Айтылгандай, блоктун көлөмүн көбөйтүү түйүндөр көбүрөөк маалыматты иштетиши керек дегенди билдирип, бул айрым операторлор үчүн кыйыныраак болушу мүмкүн. Жогоруда айтылган PeerDAS жана Verkle Trees чечимдери бул жүктү жеңилдетүү үчүн иштелип чыккан.
Жол картасы жана активдештирүү убактысы
Fusaka негизги тармакты ишке киргизүүгө чейин сынама блокчейн тармагын активдештирүүдөн баштап этап менен жайгаштырылат:
Holesky сынама блокчейн тармагы: активациясы 2025-жылдын 1-октябрына пландалган
Sepolia сынама блокчейн тармагы: активациясы 2025-жылдын 14-октябрына пландалган
Hoodi сынама блокчейн тармагы: активациясы 2025-жылдын 28-октябрына пландалган
Негизги тармактын пландалган датасы: 2025-жылдын 3-декабры (даталар сынама блокчейн тармагы жыйынтыгына жараша өзгөрүшү мүмкүн)
Ар бир сынама блокчейн тармагы иштеп чыгуучуларга майнаптуулукту, туруктуулукту текшерүүгө жана негизги тармакка чыгаруунун алдында бардык көйгөйлөрдү оңдоого жардам берет. Так даталар тесттердин канчалык деңгээлде өткөнүнө жараша өзгөрүшү мүмкүн.
Ичинде кандай өзгөрүүлөр болду?
Peer Data Availability Sampling (PeerDAS)
Адатта валидаторлор транзакцияларды ырастоо жана блокчейнди сактоо үчүн ири көлөмдөгү blob'дорду жүктөп алып, сакташы керек.
PeerDAS бул жагдайды өзгөртүп, валидаторлорго ар кандай түйүндөрдөн бул blob'дордун чакан бөлүктөрүн туш келди үлгүлөп текшерүүгө мүмкүндүк берет. Ар бир жолу бүтүндөй бир китепти окугандан көрө, маалыматтын үлгүлөрүн алуу сыяктуу элестетиңиз. Ошентип, валидаторлор маалыматтардын бардыгын жүктөп албастан, алардын бар экенин жана так экенин тез тастыктай алышат.
Verkle Trees
Verkle Trees учурдагы маалымат сактоо ыкмаларын блокчейн абалынын бөлүктөрүн далилдөө үчүн чаканыраак жана майнаптуу структура менен алмаштырат. Мунун натыйжасында ырастоо ылдамыраак болуп, сактагыч мейкиндигине болгон муктаждык кыскарып, блокчейн өсүп жатканда Ethereum'дун масштабдуулугун сактоого жардам берет.
Транзакция чегин жогорулатуу
Транзакция чегинин жогорулашы Ethereum'га ар бир блокто көбүрөөк транзакцияларды жана татаал операцияларды иштетүүгө мүмкүнчүлүк берет. Бул маанилүү, анткени тармак кеңейген сайын жана көбүрөөк колдонуучулар DeFi долбоорлору, NFT жана акылдуу келишимдер менен өз ара аракеттенүүнү каалашат.
Бирок, чоңураак блокторду иштетүү түйүндөр үчүн көбүрөөк сактагычты жана өткөрүү жөндөмдүүлүгүн талап кылат. Fusaka'дагы Verkle Trees жана PeerDAS бул кошумча жүктү азайтууну көздөгөнү менен, түйүн операторлору кабардар болуп, зарыл болсо өз жөндөөлөрүн жаңыртып турушу керек.
Fusaka колдонуучулар, иштеп чыгуучулар жана валидаторлор үчүн эмнени билдирет
Колдонуучулар: Тармак көбүрөөк иш-аракетти иштете алгандыктан, жүктөм көп болгон учурда да транзакцияларды ылдамыраак ырастоону байкашыңыз мүмкүн. Транзакция акылары алдын ала баамдалгыдай болуп калышы мүмкүн, бирок алар суроо-талаптын негизинде өзгөрө берет.
Иштеп чыгуучулар: Чоңураак blob сыйымдуулугу жана PeerDAS бириктирүүчү катмарлардын (2-катмардагы масштабдоо чечимдери) Ethereum'га маалымат берүү жолун жакшыртып, аларды ишенимдүү жана майнаптуураак кылат.
Валидаторлор жана түйүн операторлору: Маалымат үлгүлөөдөн улам, валидаторлор бардык blob маалыматтарын жүктөп алууга муктаж болбой, каналдын колдонулушун азайтат. Бирок, өзгөртүүлөрдү колдоо үчүн бир нече тармак конфигурациясы жана жаңыртуулары керек болот.
Коопсуздук жана мүчүлүштүктөрдү аныктоо үчүн сыйлык
Коопсуз Ethereum жаңыртуусунун маанисин эске алуу менен, Ethereum Фонду Fusaka'нын күтүлгөн ишке киргизилишинин алдында төрт жумалык мүчүлүштүктөрдү аныктоо үчүн сыйлык программасын өткөрүүдө. Коддун коопсуздугун жакшыртуу үчүн коомчулуктун жетекчилигиндеги кароону стимулдаштыруучу, олуттуу кемчиликтерди аныктоо үчүн $2 миллион чейин сыйлык берилет.
Жыйынтыктоочу ойлор
Fusaka жаңыртуусу Ethereum'дун көбүрөөк транзакцияларды иштетип, майнаптуу иштешине жардам берген чоң кадам болуп саналат. Транзакция чегин жогорулатып жана PeerDAS менен Verkle Trees сыяктуу акылдуу маалымат ырастоо ыкмаларын киргизүү аркылуу бул жаңыртуу келечектеги өсүштү колдойт жана ошол эле учурда Ethereum'дун борбордон ажыратууга жана коопсуздукка болгон умтулуусун бекемдейт.
Андан ары окуу
Дисклеймер: бул мазмун сизге «бар болгон абалында» гана жалпы маалымат жана билим берүү максатында сунушталат, жана анын тактыгы, же башка кандайдыр бир кепилдик бериле албайт. Каржылык, юридикалык же башка кесиптик кеңеш катары кабыл алынбашы керек жана ал кандайдыр бир белгилеген үнөмдү же кызматты сатып алууну сунуштоо максатында да арналган эмес. Сиз өзүңүздүн абалыңызга ылайык тиешелүү кесиптик кеңешчилерден кеңеш алганыңыз маанилүү. Бул макалада айтылган өнүмдөр сиздин аймакта жеткиликтүү болбой калышы мүмкүн. Эгер макала үчүнчү жактын катышуучусу тарабынан берилсе, анда ал пикирлер үчүнчү жакка таандык экенин жана ал пикирлердин ар дайым Binance академиясынын көз карашын чагылдырбашы мүмкүн экенин эске алыңыз. Толугураак маалымат алуу үчүн биздин жоопкерчиликтен баш тартуу тууралуу толук эскертмени окуп чыгыңыз. Санарип активдердин баасы туруксуз болушу мүмкүн. Сиздин инвестицияңыздын наркы төмөндөшү же жогорулашы ыктымал жана сиз салган сумманы кайра кайтарып албай калышыңыз мүмкүн. Инвестиция боюнча кабыл алган чечимдер үчүн толугу менен өзүңүз жооп бересиз жана Binance академиясы сиз тарткан жоготуулар үчүн жооптуу эмес. Бул материал каржылык, юридикалык же башка кесиптик кеңеш катары кабыл алынбашы керек. Кененирээк маалымат үчүн биздин Колдонуунун шарттарын жана Тобокелчилик жөнүндө эскертүүнү окуп чыгыңыз.