ლიკვიდურობა
საზოგადოების მიერ წარდგენილი - ავტორი: ანონიმური
ტერმინი
ლიკვიდურობა გამოიყენება კონკრეტული აქტივის გაყიდვის ან ყიდვის შესაძლებლობის აღსანიშნად ამ აქტივის საბაზრო ფასზე მნიშვნელოვანი ზეგავლენის მოხდენის გარეშე. ის ასევე აღნიშნავს, თუ რამდენად მარტივად არის შესაძლებელი ამ აქტივის
ფიატ-ვალუტაში კონვერტაცია. ქონება ან აქტივები, რომელთა ნაღდ ფულში კონვერტაცია რთულია, ითვლება არალიკვიდურად, ხოლო თუ მათი გადაცვლა მომენტალურად არის შესაძლებელი, ეს იმას ნიშნავს, რომ საქმე გვაქვს ლიკვიდურ აქტივთან.
ბაზრები ითვლება ლიკვიდურად, როდესაც ტრეიდერს ან ინვესტორს შეუძლია მომენტალურად გაყიდოს ან იყიდოს კონკრეტული აქტივი, ეს იმას ნიშნავს, რომ ამ ვაჭრობისთვის შემხვედრი მხარის მოძებნა ყოველთვის მარტივადაა შესაძლებელი. ბაზარი არ ითვლება ლიკვიდურად, როდესაც ტრეიდერს უწევს ხანგრძლივი ლოდინი საკუთარი შეკვეთის აღსრულებისთვის.
შესაბამისად, ტრეიდერები ეძებენ ლიკვიდურ ბაზრებს, რათა შეძლონ საკუთარი ფინანსური ინსტრუმენტების მარტივად ყიდვა ან გაყიდვა - დიდხანს ლოდინის ან არასამართლიან ფასებზე დათანხმების საჭიროების გარეშე. ლიკვიდურ ბაზრებად ითვლება ის ბაზრები, სადაც ფიქსირდება მაღალი მოცულობის სავაჭრო აქტივობები და გონივრული (ზომიერი) სპრედი შემოთავაზებისა და მოთხოვნის შეკვეთებს შორის. მაგალითად,
Binance წარმოადგენს
Bitcoin-ის ლიკვიდურ ბაზარს, რადგან ყოველთვის მარტივადაა შესაძლებელი ისეთი ტრეიდერის მოძებნა, რომელსაც სურს BTC-ის ყიდვა ან გაყიდვა, შესაბამისად
შემოთავაზება-მოთხოვნის სპრედი ჩვეულებრივ მცირე ზომისაა.
ტერმინი „ლიკვიდურობა“ ასევე გამოიყენება საბუღალტრო საქმეში, სადაც საბუღალტრო ლიკვიდურობა აღნიშნავს მსესხებელის უნარს დროულად დაფაროს ვალები. შესაბამისად, კომპანია ითვლება ლიკვიდურად, როდესაც მას შეუძლია საკუთარი სესხების და ვალების უპრობლემოდ დაფარვა.