ლიკვიდურობის სტეიკინგის ტოკენი (LST)

რა არის ლიკვიდურობის სტეიკინგის ტოკენები (LST-ები)?

ლიკვიდურობის სტეიკინგის ტოკენი (LST) არის კრიპტოვალუტის ტოკენის ტიპი, რომელიც წარმოადგენს ბლოკჩეინის, კერძოდ კი Proof-of-Stake (PoS) სისტემის ქსელზე სტეიკინგზე განთავსებული აქტივებს. PoS სისტემებში, მომხმარებლებს შეუძლიათ დაბლოკონ საკუთარი ტოკენები უზრუნველყოფის სახით, ქსელის ოპერაციების მხარდასაჭერად და ჯილდოების გამომუშავებისთვის. თუმცა, ტრადიციული სტეიკინგის დროს სტეიკინგის აქტივები იბლოკება გარკვეული პერიოდის განმავლობაში, რომლის დასრულებამდე შეუძლებელია ამ ტოკენებთან წვდომა ან მისი გამოყენებით ვაჭრობა. LST-ების მიზანია ამ პრობლემის აღმოფხვრა, რისთვისაც ის მომხმარებლებს წარმოუდგენს სტეიკინგში გამოყენებული აქტივების ტოკენიზებულ ვერსიებს, რაც მათ სთავაზობს ლიკვიდურობას და მოქნილობას სტეიკინგში მონაწილეობის პერიოდში.

როგორ მუშაობს LST?

როდესაც მომხმარებლები განათავსებენ საკუთარ აქტივებს სტეიკინგზე PoS ქსელში, სანაცვლოდ ისინი იღებენ ლიკვიდურობის სტეიკინგის ტოკენებს (LST-ებს). ეს LST-ები წარმოადგენს სტეიკინგში გამოყენებულ აქტივებს, რაც მომხმარებლებს აძლევს მათი გადაცვლის, გადარიცხვის ან სხვადასხვა დეცენტრალიზებული ფინანსების (DeFi) აპლიკაციებში გამოყენების შესაძლებლობას. ამ დროს ორიგინალი აქტივები რჩება სტეიკინგზე, თუმცა LST-ის მფლობელებს კვლავ შეუძლიათ ისარგებლონ ლიკვიდურობით და მოქნილობით და მონაწილეობა მიიღონ სხვა საინვესტიციო აქტივობებში ან საჭიროებისამებრ გამოიყენონ საკუთარი კაპიტალი.

LST-ების უპირატესობები: ლიკვიდურობის და მოქნილობის გაუმჯობესება

LST-ები კრიპტოვალუტის მფლობელებს რამდენიმე სახის სარგებელს სთავაზობს:

• გაზრდილი ლიკვიდურობა: სტეიკინგზე განთავსებული აქტივების ტოკენიზაციით, LST მომხმარებელს სთავაზობს სხვაგვარად არალიკვიდური აქტივების ლიკვიდურობას. ამ ტოკენებით შესაძლებელია ვაჭრობა ან მათი გამოყენება DeFi პროტოკოლებში.
• მოქნილობა: LST-ის მფლობელებს შეუძლიათ მარტივად იყიდონ, გაყიდონ ან გადაგზავნონ საკუთარი ტოკენები და არ დაელოდონ ტრადიციული სტეიკინგის მექანიზმებით განსაზღვრული აქტივების დაბლოკვის პერიოდის გასვლას.
• კაპიტალით ეფექტურობა: მომხმარებლებს შეუძლიათ მაქსიმალურად ეფექტურად გამოიყენონ სტეიკინგზე განთავსებული საკუთარი აქტივები. ამ დროს ისინი კვლავ შეძლებენ სტეიკინგის ჯილდოების მიღებას და ამავდროულად მონაწილეობას მიიღებენ სხვა საინვესტიციო აქტივობებში.
• დივერსიფიკაცია: LST მომხმარებლებს საშუალებას აძლევს მოახდინონ საკუთარი საინვესტიციო სტრატეგიების დივერსიფიკაცია: მონაწილეობა მიიღონ სტეიკინგში ერთ პლატფორმაზე და ამავდროულად გამოიყენონ LST-ები სხვა DeFi პროტოკოლებში.

Wrapped Beacon ETH (WBETH)

ლიკვიდური სტეიკინგის ტოკენის ერთ-ერთი მაგალითია Wrapped Beacon ETH (WBETH), რომელიც წარმოადგენს სტეიკინგში გამოყენებულ ETH-ს და მისი საშუალებით მიღებულ ჯილდოებს. WBETH-ის მეშვეობით, ETH-ის სტეიკერებს საშუალება ეძლევათ ისარგებლონ სტეიკინგზე განთავსებული აქტივებით: მონაწილეობა მიიღონ სხვადასხვა DeFi პროცესებში და ამავდროულად განაგრძონ ETH-ის სტეიკინგის ჯილდოების გამომუშავება. WBETH-ის მეშვეობით შემოსავლის მიღება მომხმარებლებს შეუძლიათ სხვადასხვა აქტივობებში მონაწილეობით, როგორიცაა ყიდვა და შენახვა, ლიკვიდურობის ფარმინგი, გასესხება, სესხება და სტრუქტურირებულ პროდუქტებში მონაწილეობა.

დასკვნა

ლიკვიდურობის სტეიკინგის ტოკენები (LST-ები) მნიშვნელოვან როლს ასრულებს კრიპტოვალუტების და დეცენტრალიზებული ფინანსების ეკოსისტემის ფორმირებაში. სტეიკინგზე განთავსებული აქტივების ლიკვიდურობის და მოქნილობის შემოთავაზებით, LST-ები მომხმარებელს აძლევს საკუთარი ინვესტიციებიდან მაქსიმალური სარგებლის მიღების შესაძლებლობას, რაც გულისხმობს სხვადასხვა DeFi აქტივობებში მონაწილეობას და ამავდროულად სტეიკინგის ჯილდოების გამომუშავებას. LST-ები კრიპტოვალუტების მფლობელებს სთავაზობს მნიშვნელოვან ინსტრუმენტს, რაც იძლევა საინვესტიციო სტრატეგიების ოპტიმიზაციის და კომპლექსურ DeFi სამყაროში გზის გაკვლევის შესაძლებლობას.