Keccak

Keccak (წარმოითქმის როგორც „კეტჩაკ“) არის მრავალმხრივი კრიპტოგრაფიული ფუნქცია, რომელიც შექმნილია გვიდო ბერტონის, ჯოან დემენის, მიქაელ პიტერსის და ჟილ ვან ასშეს მიერ. მიუხედავად იმისა, შესაძლებელია Keccak-ის სხვა მიზნებისთვის გამოყენება, ის უფრო ცნობილია როგორც ჰეშის ფუნქცია, რომლითაც ხდება უსაფრთხოების ძველი ჰეშის ისეთ ალგორითმებთან შედარებით მაღალი დონის უზრუნველყოფა, როგორიცაა SHA-1 და SHA-2.

SHA აღნიშნავს ჰეშირების უსაფრთხო ალგორითმს (Secure Hash Algorithm) და ეხება აშშ-ს სტანდარტებისა და ტექნოლოგიების ეროვნული ინსტიტუტის (NIST) მიერ გამოქვეყნებულ კრიპტოგრაფიული ჰეშის ფუნქციების ერთობლიობას. როგორც, SHA-1 ისე SHA-2 შექმნილია აშშ-ს ეროვნული უსაფრთხოების სააგენტოს (NSA) მიერ და, მათ გააჩნიათ მსგავსი სტრუქტურა. მიუხედავად იმისა, რომ Keccak მხარს უჭერს გამომავალი მონაცემების იმავე ზომას (ჰეშის სიგრძე), როგორც SHA-2, მას გააჩნია საკმაოდ განსხვავებული მუშაობის მექანიზმი. თუმცა, Keccak არის SHA ოჯახის ნაწილი და ხშირად მოიხსენიება როგორც SHA-3.

მიუხედავად იმისა, რომ SHA-2-ზე ჯერ არ დაფიქსირებულა რაიმე მნიშვნელოვანი შეტევა, მოსალოდნელია, რომ დროთა მანძილზე შეიძლება მოხდეს ჰეშის ფუნქციების „გატეხვა“ და ახალი სტანდარტული ფუნქციის შემუშავებას კი წლები დასჭირდება. ზემოთაღნიშნულისა და ასევე 2004-2005 წლებში SHA-1-ის წინააღმდეგ განხორციელებულ წარმატებული შეტევების გათვალისწინებით, NIST-მა გააცნობიერა ახალი კრიპტოგრაფიული ჰეშის ალგორითმის შექმნის აუცილებლობა. 2012 წელს NIST-მა გამოაცხადა, რომ კონკურსის გამარჯვებული ალგორითმი იყო Keccak და შემდეგ მოხდა მისი, როგორც SHA-ს ოჯახის უახლესი წევრის სტანდარტიზაცია (აქედან გამომდინარე, SHA-3). 

NIST-ის მიერ Keccak-ის არჩევის ერთ-ერთი მიზეზია მისი ინოვაციური სტრუქტურა, რომელიც სხვა ალგორითმებთან შედარებით აღმოჩნდა უფრო უსაფრთხო და ეფექტური. ტექნიკური თვალსაზრისით, SHA-3 ალგორითმი ეყრდნობა ეგრეთ წოდებულ „ღრუბელის“ ფუნქციებს (ან „ღრუბელის“ სტრუქტურას) - განსხვავებით SHA-1-ში და SHA-2-ში გამოყენებული Merkle Damgård-ის სტრუქტურისგან.