Eham Nukaat
Binance par stock ke daimi contracts (jinhein equity perps ya TradFi Perps bhi kaha jata hai) aap ko riwayati brokerage account ki zarurat ke baghair MSTR, AMZN aur COIN jaise infaradi noiyat ke stocks mein leverage ke sath exposure hasil karne ki sahulat dete hain.
Yeh contracts 24/7 trade hote hain, USDT mein settle hote hain, aur in mein ziada se ziada leverage 10x hoti hai.
Funding fees har aath ghante mein settle hoti hain, jin ki hadd ka rate ±2.00% hota hai, jis se contract ki qeematon ko bunyadi stock ki qeemat ke qareeb rakhne mein madad milti hai.
Chunkeh equity perps mein leverage istemal hoti hai, is liye in mein numayan khatrat bhi shamil hote hain, jin mein forced liquidation, funding ke ikhrajat aur non-trading auqat ke doran price gaps shamil hain.
Taaruf
Binance Futures, products ki ek category ki peshkash karta hai jise TradFi Perps kaha jata hai: daimi futures contracts jo riwayati financial assets jaise equities, commodities aur forex ki qeemat ko track karte hain. Conventional stock trading ke baraks, jo exchange ke auqat kaar tak mehdood hoti hai, TradFi Perps haftay ke saat din, 24 ghante musalsal trade hote hain.
Stock daimi contracts, TradFi Perps ka ek subset hain jo riwayati exchanges, jaisa keh Nasdaq, par list shuda infaradi company ke stocks ki qeemat ko track karte hain.
Is article mein wazahat ki gayi hai keh stock ke daimi contracts kaise kaam karte hain, in ki eham khasoosiyat kia hain, aur shuru karne se pehle kin khatrat ko madd e nazar rakhna chahiye.
Stock ke Daimi Contracts kia hote hain?
Stock daimi contracts derivative instruments hote hain jo kisi company ke shares ki haqeeqi waqt ki qeemat ko track karte hain, aur in ke liye aap ko bunyadi stock ki malkiyat hasil karne ki zarurat nahi hoti. Yeh crypto daimi futures ki tarah kaam karte hain: in ki koi expiry date nahi hoti, yeh USDT mein settle hote hain, aur contract ki qeematon ko bunyadi asasy ki spot price ke qareeb rakhne ke liye funding rate mechanism istemal kiya jata hai.
Crypto daimi futures se is ka bunyadi farq yeh hai keh stock markets band hone par qeematon ko kis tarah handle kiya jata hai. Riwayati equity markets pre-market, regular, after-hours aur overnight sessions ke zariye 24/5 schedule par operate karti hain. Haftay ke aakhir ke dinon mein aur chution ke doran bunyadi exchange par trading mukammal tor par ruk jati hai.
Orderbook EWMA mode
2026-05-08 ko 21:00 (UTC) se, Commodity par mabni TradFi Perps par Fixed mode ki jagah Orderbook EWMA mode ka itlaq kiya jaye ga.
2026-05-16 ko 00:00 (UTC) se, equity par mabni TradFi Perps par Fixed mode ki jagah Orderbook EWMA mode ka itlaq kiya jaye ga.
Vendors se hasil karda qeematein istemal karne ke bajaye, index price ke liye orderbook se hasil ki jane wali Impact Mid Price istemal hoti hai, jahan Impact Mid Price, Impact Bid Price aur Impact Ask Price ki aust hoti hai. Impact Bid Price aur Impact Ask Price ka hisab lagane ke liye, barah e karam Binance Futures ke Funding Rates ka Taaruf mulahiza karein.
Index ko bhi exponentially weighted moving average (EWMA) istemal karte huwe smooth kiya jata hai. Is ke ilawa, index price ki tabdeeli ko orderbook EWMA mode ke andar mehdood rakha jata hai.
Is design ka maqsad market ka aaghaz hone par qeemat mein achanak izafe ko rokna aur kam liquidity ke arsay ke doran forced liquidations ke khatre ko kam karna hai.
Binance par Stock Daimi Contracts ki Trading
Neeche kuch USDⓈ-M equity daimi contracts diye gaye hain jo February 2026 mein Binance Futures par launch kiye gaye thay:
MSTRUSDT: Strategy Inc. ke Common Stock (Nasdaq: MSTR) ko track karta hai
AMZNUSDT: Amazon.com Inc. ke Common Stock (Nasdaq: AMZN) ko track karta hai
CRCLUSDT: Circle Internet Group Inc. ke Common Stock (Nasdaq: CRCL) ko track karta hai
COINUSDT: Coinbase Global Inc. ke Common Stock (Nasdaq: COIN) ko track karta hai
PLTRUSDT: Palantir Technologies Inc. ke Common Stock (Nasdaq: PLTR) ko track karta hai
Tamam contracts mein bunyadi khasoosiyat ek jaisi hain: USDT settlement, 5 USDT ki kam se kam farzi qaddar, 0.01 ka tick size, aur bunyadi stock ki 0.01 units ki kam se kam trade ki amount. Multi-Assets Mode tamam contracts par muawnat shuda hai, jis ka matlab hai keh aap BTC jaise dusre assets ko zamanat ke tor par istemal kar sakte hain, jo applicable haircuts se mashroot hain.
Aap Binance ke homepage par [Futures] tab mein ja kar, aur phir [TradFi] ke neeche apne muntakhib karda contract ka intekhab kar ke trading ke liye dastiyab stock ke daimi contracts ki mukammal list dekh sakte hain. TradFi tab mein ETF contracts, natural gas daimi contracts, crude oil futures aur gold aur silver jaise qeemati metals ke contracts bhi shamil hain.
Jab aap us muntakhib karda contract ke page par hon jis ki aap trading karna chahte hain, to aap neeche right side par apne Futures account ka balance check kar sakte hain. Agar aap ka balance zero hai, to aap is mein funds in tareeqon se shamil kar sakte hain:
Transfer Karein
Crypto Khareedein
Swap Karein
Aap page ke right side par mojood panel se apna khareedari ya farokht ka order kar sakte hain. Apni pasand ki order ki qisam (limit, market, ya stop limit) ka intekhab karein aur settings ko apni zarurat ke mutabiq configure karein. Agar aap abhi trading shuru kar rahe hain, to aap Binance par order ki iqsaam se mutalliq Academy guide mulahiza kar sakte hain.
Stock Daimi Contracts ki Eham Khasoosiyat
Funding Fee Settlement ki frequency
Binance par tamam stock ke daimi contracts ki funding fees har aath ghante mein settle hoti hain. Funding rates long aur short positions ke darmiyan exchange hone wali periodic payments hoti hain. Yeh contract ki qeemat ko bunyadi stock ki qeemat ke qareeb rakhne mein madad karti hain. Stock daimi contracts ke liye funding rate ka interest rate component 0% hai, jabkeh har settlement interval ke liye capped rate ±2.00% hai.
Ek eham baat jo note karni chahiye, wo yeh hai keh stock ke daimi contracts mayaari usool se mustasna hain, jis ke mutabiq jab pichli funding rate settlement cap ya floor tak pohanch jaye, to funding interval ko har ek ghante mein adjust kiya jata hai. Funding rate kitna bhi ziada ho, aath ghante ka interval mustaqil rehta hai. Aap apne trading page par mojood [Funding] tab par cursor le ja kar contract ki funding ka mukhtasir khulasa dekh sakte hain, aur agar aap ziada mukammal tafseel dekhna chahein to [Funding Rate ki History] ke link par bhi click kar sakte hain.
Leverage
Binance Futures par stock ke tamam daimi contracts filhal 10x ki ziada se ziada leverage ko support karte hain. Is ka matlab hai keh aap apni zamanat ki qadar se das guna tak ki qadar ki position open kar sakte hain. Jab aap apne muntakhib karda contract ka trading page kholte hain, to aap ko ek pop-up mosool ho sakta hai jo aap ko bataye ga keh aap ki pehle se muntakhib karda leverage dastiyab nahi hai (misal ke tor par, agar aap ne pehle 20x ki leverage muntakhib ki thi).
Binance, market ke khatre ki soorat e haal ki bunyad par leverage ke darjaat aur margin ke taqazon ko adjust kar sakta hai, is liye trading se pehle taza tareen tafseelat ka jaiza lena mufeed hai.
Ziada leverage se nafa aur nuqsan dono mein izafa ho sakta hai. Binance ke darje par mabni margin ke system ke mutabiq, jaise jaise aap ki farzi position barhti hai, position size aur dastiyab leverage bhi kam ho sakti hai.
Stock ke Daimi Contracts ki Trading ke Fawaid
Stock ke daimi contracts un traders ko kuch amli fawaid faraham kar sakte hain jo pehle se crypto derivatives markets mein sargaram hain:
24/7 rasai: Aap kisi bhi waqt qeemat par asar andaz hone wale waqiyat (earnings releases, macroeconomic data, jughrafiyai siyasi developments) par amal kar sakte hain, jin mein weekends bhi shamil hain jab riwayati markets band hoti hain.
Account transfers ki zarurat nahi: Pehle se Binance Futures accounts rakhne wale traders alag brokerage account kholy baghair ya funds ko platform se bahar muntaqil kiye baghair equity price mein exposure hasil kar sakte hain.
USDT mein settled: Tamam contracts USDT mein settle hote hain, jis se crypto ecosystem ke andar aap ke nafa aur nuqsan account ke mustaqil unit mein rehte hain.
Multi-Assets Mode: Aap BTC ya dusre supported assets ko zamanat ke tor par istemal kar sakte hain, jis se khas tor par USDT hold karne ki zarurat se bachne ka imkan hota hai.
Expiry ki pareshani nahi: Riwayati futures contracts ke baraks, daimi contracts mein expiry par positions ko aagy roll karne ki zarurat nahi hoti, jis se operation se mutalliq paichedagi ki ek satah khatam ho jati hai.
Trading se pehle ghour talab khatrat
Stock ke daimi contracts ki trading mein khatra shamil ho sakta hai. Neeche kuch eham awamil diye gaye hain jinhein madd e nazar rakhna chahiye.
Leverage se nuqsanat mein izafa ho sakta hai
Leverage se mumkinah nafay ke sath sath nuqsanat mein bhi izafa ho sakta hai. Agar market aap ki position ke khilaf jaye, to aap apne ibtidayi margin se ziada nuqsan utha sakte hain. Forced liquidation us waqt hoti hai jab aap ka margin balance maintenance margin level se neeche gir jata hai, jis soorat mein aap ki position khud kaar tor par band ki ja sakti hai.
Funding ke ikhrajat jama ho sakte hain
Funding fees har aath ghante baad charge ki jati hain, aur waqt ke sath leveraged position hold karne ka matlab hai keh yeh ikhrajat jama hote rehte hain. Volatile ya trend karne wali markets mein, funding rate har interval ke liye ±2.00% ki hadd tak pohanch sakta hai, jo settlement ke kai doraniyon mein ek numaiyan lagat ban sakti hai.
Market ke aaghaz par price gaps
Agarcheh Binance ke pricing mechanisms trading sessions ke darmiyan tabdeeliyon ko aasan karne ke liye design kiye gaye hain, lekin qeemat se mutalliq eham events (jaisa keh exchange band hone ke baad earnings ke aelanaat, macro events, ya corporate actions) stock markets ke dobara khulne par numaiyan price gaps ka sabab ban sakte hain. Yeh gaps liquidations ko trigger kar sakte hain ya open positions ko mutasir kar sakte hain, chahe contract ne haftay ke aakhir par ya raat ke waqt nisbatan mustaqil qeemat par trade kiya ho.
Sharaait mein tabdeeliyan
Binance market ke khatre ki soorat e haal ki bunyad par contract ki sharaait ko adjust kar sakta hai, jin mein funding fee structures, tick sizes, ziada se ziada leverage, ibtidai margin, aur maintenance margin ki zarooriat shamil hain. Yeh tabdeeliyan mojooda positions ko mutasir kar sakti hain. Futures grid strategies chalanay wale users ko updates par nazar rakhni chahiye, kiun keh tabdeeliyan grid strategies ke expire hone ka sabab ban sakti hain.
Risk management tools istemal karein
Apne exposure ko manage karne ke liye stop-loss orders aur position sizing strategies istemal karne par ghour karein. Kabhi bhi apni bardasht ki had se ziada raqam trade na karein, aur is baat se aagah rahein keh riwayati equity instruments par leverage, crypto ke daimi futures ke muqable mein khatre ke mukhtalif dynamics paida karti hai.
FAQ
Binance par stock ke perpetual contract se Kia Muraad hai?
Stock ka daimi contract ek leveraged derivative hai jo kisi company ke stock ki qeemat ko baghair kisi expiry date ke track karta hai. Yeh crypto ke daimi futures ki tarah kaam karta hai lekin equity prices ko track karta hai aur USDT mein settle hota hai.
Stock ke daimi contracts par funding fees kitni dair baad charge ki jati hain?
Binance par tamam stock ke daimi contracts ke liye funding fees har aath ghante mein settle ki jati hain. Funding rate ki hadd har interval ke liye ±2.00% hai, aur interest rate component 0% hai. Dusre daimi contracts ke baraks, equity perps ke liye aath ghante ka funding interval ek ghante tak kam nahi kiya jaye ga, chahe funding rate us hadd tak pohanch jaye.
Dastiyab ziada se ziada leverage se kia muraad hai?
Tamam stock ke daimi contracts filhal 10x tak leverage faraham karte hain. Binance market ke halaat ki bunyad par kisi bhi waqt leverage ke darjaat aur margin ke taqazon ko adjust kar sakta hai, aur darje par mabni margin system ke tehat ziada farzi positions aam tor par kam ziada se ziada leverage ke sath aati hain.
Kia main stock ke daimi contracts ki trading ke liye crypto ko zamanat ke tor par istemal kar sakta/sakti hun?
Ji haan. Tamam stock ke daimi contracts ke liye Multi-Assets Mode muawnat yafta hai, jis ka matlab hai keh aap trading ke waqt BTC jaise assets ko margin ke tor par istemal kar sakte hain. Ghair-USDT zamanat par mutaliqa haircuts ka itlaq ho ga.
Ikhtitami Khayalat
Agar aap crypto space se bahar ke assets mein ziada exposure hasil karna chahte hain, to stock ke daimi contracts Binance Futures par aap ki trading ke liye dastiyab ikhtiyarat mein wus'at paida karte hain. Kisi bhi derivative products ki trading ki tarah, in ke mechanisms aur in se wabasta khatrat ko samajhne ke liye kuch waqt zaroor nikalein.
Mazeed Mutala
Disclaimer: Yeh content aap ke liye "jesa hai" ki bunyaad par sirf amoomi maloomat aur taleemi maqaasid ki gharz se pesh kiya giya hai, aur is mein kisi qisam ki numaindagi ya zamanat shamil nahi. Isse mali, qanooni ya deegar qisam ki professional advice nahi samjha jana chahiye, na he is ka maqsad kisi makhsoos product ya service ki khareedari ki tajweez dena hai. Aap ko chahiye keh zati mashware ke liye muta'alqa professional advisors se mashwara lein. Jahan ye content kisi third party contributor ki janib se pesh kia jaye, barahe karam note karein keh wo khayalat us third party contributor ke hain, aur zaroori nahi ke wo Binance Academy ke mu'aqif ki akasi karte hon. Digital asset ki qeematein gher mustehkum ho sakti hain. Aap ki sarmayakari ki value kam ya ziada ho sakti hai aur ho sakta hai ke aap ko apni lagai gai raqam wapis na mile. Aap ke saramayakari ke faislon ki mukammal zamadari aap par hai aur Binance Academy aap ko hone wale kisi bhi qisam ke nuqsanat ke liye zimadar nahi hai. Mazeed maloomat ke liye, hamari Istemal ki Sharaait, Khatray ka Intibah aur Binance Academy ki Sharaait mulahiza karein.