Disclaimer: Yeh content sirf amoomi maloomat aur taleemi maqasid ke liye hai. Ho sakta hai keh is article mein mojood products aap ke ilaqay mein dastiyab na hon.
Eham Nukaat
Binance Futures gold (XAUUSDT) aur silver (XAGUSDT) ke daimi contracts paish karta hai, jo futures ki trading ko cryptocurrencies se barha kar qeemti metals tak wasee karta hai.
Yeh contracts USDT mein naqd raqam ki soorat mein settle hote hain aur gold aur silver ki qeematon ko haqeeqi dunya mein track karte hain, taa keh aap haqeeqi metal ke maalik banein ya usay mehfuz kiye beghair barhti aur kam hoti dono qeematon mein trade kar sakein.
Yeh contracts din ke 24 ghante, hafte ke saat din trade hote hain, fractional sizes ko support karte hain, aur aap ko kam sarmaya kaari ki raqam ke sath ziada exposure ke liye leverage istemal karne ki sahulat dete hain.
Kiun keh ye daimi contracts hain, is liye contract ki qeemat ko bunyadi metal ki qeemat ke qareeb rakhne ke liye long aur short traders ke darmiyan funding rates ka tabadla hota hai.
Leverage nafaa aur nuqsanat dono ko barhata hai,
Taaruf
Tareekhi tor par, qeemti metals ki trading ka matlab hai keh pecheeda institutional markets mein ziada lagat aur mehdood waqt mein navigate karna. Binance Futures Gold (XAU) aur Silver (XAG) contracts paish karne ke zariye isay tabdeel karte hain. Yeh integration users ko crypto technology ki flexibility ke sath riwayati value stores trade karne ki sahulat deti hai.
Binance par Gold aur Silver Futures Kia Hain?
Binance par, gold and silver ko USDT margined daimi contracts ke tor par trade kiya jata hai. Is ka matlab hai keh agarcheh haqeeqi qeemat gold aur silver ke ounces ki haqeeqi qeemat ko track karti hai, lekin settlement stablecoin USDT mein anjaam di jati hai.
Gold Futures: Ticker XAUUSDT
Silver Futures: Ticker XAGUSDT
Haqeeqi settlement ke baraks, jahan par trader metal ki delivery hasil kar sakta hai, yeh contracts naqd raqam ki soorat mein settle hote hain. Traders storage, insurance, ya logistics ki fikar kiye baghair metals ki qeematon mein hone wali tabdeeliyon ke lehaz se andaza lagate hain.
Dusre alfaaz mein, jab aap Binance par in contracts ko trade karte hain, to aap gold ya silver ki haqeeqi bars nahi khareed rahe. Balkeh, aap aese digital contract track kar rahe hain jo keh metal ki haqeeqi dunya ki qeemat ko track karta hai.
Yeh tasawwur aasan hai: Agar aap ko lagta hai keh qeemat oopar jaye gi, to aap (Long) khareedari karte hain. Agar aap ko lagta hai keh qeemat neeche jaye gi, to aap (Short) farokht karte hain. Tamam nafaa aur nuqsanat USDT mein adaa kiye jate hain.
Crypto Exchange par Metals Trade karne ke fawaed
Commodity trading ki digitization trading futures ke ''puranay tareeqay'' ke muqablay mein kafi ziada behtariyan faraham karti hai.
1. 24/7 market tak rasai
Purani commodity markets ke khulne aur band hone ke auqat hain, wo weekends par band hote hain. Agar saturday ko siyasat ya maeeshat ke baray mein koi barri khabar saamne aati hai, to riwayati traders Monday tak band rehte hain. Binance par, market saal ke 365 din khuli rehti hai. Agar koi khabar Sunday ko raat ke 3 baje saamne aati hai, to aap fori tor par radd e amal de sakte hain aur trade kar sakte hain.
2. Dakhil hone ke liye kam rukawatein
Riwayati markets mein, gold ka ek wahid futures contract bohat mehnga hota hai. Is ke liye aksar sirf trade shuru karne ke liye hazaron dollars chahiye hote hain. Is waja se bohat se aam traders is mein hissa nahi le patay. Binance Futures aap ko ek ounce ke bhi chote se hisse ko trade karne ki sahulat deta hai, taa keh aap kam raqam ke sath sarmaya kaari shuru kar sakein.
3. Leverage
Futures contracts traders ko kam sarmaya kaari (margin) ke sath barri positions tak exposure hasil karne ki sahulat dete hain. Jahan leverage asset aur market ke halaat ke mutabiq mukhtalif hota hai, wahin yeh raqam ki behtareen sarmaya kaari ki sahulat bhi deta hai. Misal ke tor par, 10x leverage istemal karne ka matlab hai keh trader taqreeban $1,000 margin ke sath $10,000 maliyat ke gold contracts control kar sakta hai.
Funding Rates ko Samajhna
Agar aap crypto Futures mein naye hain, to funding rates ka tasawwur preshan kunn ho sakta hai, lekin yeh haqeeqat mein kafi aasan hai. Chunkeh ye futures contracts kabhi expire nahi hote (aap inhein hamesha hold kar sakte hain), nizam ko ek aesa tareeqa chahiye jo is baat ko yaqeeni banaye keh contract ki qeemat gold ki haqeeqi qeemat ke qareeb rahe.
Funding ki adaegi:Yeh wo adaegi hai jo har chand ghanton ke baad traders (khareedar aur farokhat kunanda) ke darmiyan ki jati hai. Note karein keh yeh exchange ko adaa ki jane wali fee nahi hai.
Mauqa:Agar funding rate positive ho, to khareedari karne wale traders farokht karne wale traders ko adaiygi karte hain. Agar yeh negative ho, to farokht karne walay traders khareedari karne wale traders ko adaiygi karte hain. Kuch market ke rujhanat mein, ek positions hold karna (jesa keh bohat mazboot bullish rujhan ke doran short position hona) trader ko in funding fees se passive aamdani hasil karne ka mauqa de sakta hai.
Khartay ka Intizam
In assets ki trading pehle se kahin ziada aasan hai, lekin is ka ye matlab bhi hai keh aap pehle se ziada taizi ke sath paisy kho sakte hain.
Leverage ka khatra: Yad rakhein keh leverage ek multiplier hai. Agar aap ziada leverage istemal karte hain, to qeemat mein hone wali mamooli si kammi aap ke puray ke puray account ke khatam hone ka sabab ban sakti hai hai. Misal: Agar aap 20x leverage istemal karte hain, aur gold ki qeemat sirf 5% se kam hoti hai, to aap apni 100% raqam kho sakte hain. Isay forced liquidation kehte hain.
Market volatility: Albatta gold ko ek mustehkam ''safe haven'' asset samjha jata hai, taham crypto derivative ki markets mein tabdeeliyan aa sakti hain.
Mehfooz kese rahein
Mehfooz rehne ke liye, traders aksar khatray ki intizami hikmat amliyan istemal karte hain, jis mein yeh sab shamil hain:
Mumkinah nuqsanat mehdood karne ke liye hikmat amli ke mutabiq stop loss orders set karna.
Account ko lambe arse tak qayim rakhne ke liye position size ko manage karna.
Bohat ziada leverage se bachna.
Binance Futures par Gold aur Silver Trade Karne ka Tareeqa
1. Apne Binance account mein log in karein, [Futures] tab par jayein, phir [USD(S)-M Futures] par jayein.
Note: ho sakta hai ke yeh product kuch ilaqon mein dastiyab na ho.
2. Agla marhala, drop down menu kholein aur XAUUSDT (gold ke liye) ya XAGUSDT (silver ke liye) talash karein.
Aap [TradFi] category mein yeh aur deegar contracts bhi talash kar sakte hain.
3. Neeche dayein janib, aap apna Futures account ka balance check kar sakte hain. Agar aap ka balance zero hai, to aap funds shamil karne ke liye [Transfer karein], [Crypto Khareedein], ya [Swap Karein] ki khasoosiyat istemal kar sakte hain.
Agar aap pehli martaba Binance Futures istemal kar rahe hain, to aap ko ek Future Account kholne ki zarurat ho gi
Shuru karne se pehle aap ko ek Futures Quiz mukammal karne ki bhi zarurat ho sakti hai.
4. Jab aap tayar hon, to aap order panel ka istemal karte howe futures contracts khareed aur farokht kar sakte hain.
5. Agar aap sab se oopar dayein janib [Cross] par click ya tap karte hain, to aap Cross Mode aur Isolated Mode ke darmiyan switch kar sakte hain.
Cross Margin aap ke margin aur liquidation levels ka hisab karte waqt aap ke futures account aur tamam futures positions mein mojood tamam assets ko shumar kare ga. Is ka matlab hai keh aap ki open positions ek dusre ko mutasir kar sakti hain, chahe wo mukhtalif assets mein mojood hon. Misal ke tor par, aap ki gold position silver position par hone wale nuqsanat ko pura karne ke liye liquidate ki ja sakti hai, chahe wo dono mukhtalif trading joray hain.
Makhsoos karda Margin aap ki infradi positions ko ek makhsoos asset tak mehdood karte huwe aap ko khatre ko manage karne ki sahulat deta hai. Is ka matlab hai keh aap ki isolated position aap ki deegar open position mein hone wali tabdeeliyon se mutasir nahi ho gi.
Mazeed maloomat ke liye, darj zel article mulahiza karein: Crypto Trading mein Makhsoos karda Margin aur Cross Mragin se Kia Muraad Hai?
6. Apni screen ke neeche, aap apni Positions, Open Orders, Orders ki tareekh, aur mazeed bohat kuch check kar sakte hain.
Mazeed tafseeli maloomat ke liye, aap Traditional Assets ke Daimi Futures par FAQ page check kar sakte hain.
FAQ
Binance Futures par gold aur silver ke liye Kia tickers hain?
Gold XAUUSDT aur Silver XAGUSDT ke tor par trade kiya jata hai. Dono USDT margined daimi contracts hain jo keh metal ki haqeeqi dunya mein qeemat ko track karte hain, aur tamam munafe aur nuqsanat USDT mein settle kiye jatay hain.
Jab mein in contracts ko trade karta hun, to kia mein haqeeqi gold ya silver ka maalik hota hoon?
Ji nahi. XAUUSDT aur XAGUSDT naqad raqam ki soorat mein settle hone walay derivatives hain, haqeeqi metal nahi hain. Aap gold ya silver ki qeematon se exposure hasil karte hain, lekin aap ko kabhi bhi bars deliver nahi ki jatein, is liye storage, insurance, ya logistics ka bandoobast karne ki zarurat nahi hai.
Kia Mein weekends par gold aur silver futures trade kar sakta hoon?
Ji han. Riwayati commodity markets ke baraks, jo keh weekends par aur karoobari auqat ke ilawa band hoti hain, Binance Futures par XAUUSDT aur XAGUSDT contracts din ke 24 ghante, hafte ke saat din trade karte hain.
Funding rates kis tarah meri position par asar andaz hotay hain?
Contract ki qeemat ko metal ki bunyadi qeemat ke qareeb rakhne ke liye khareedari karne wale aur farokht karne wale traders ke darmiyan har chand ghanton baad funding ki adaiygiyan ki jati hain. Agar rate positive ho, to khareedaari karne wale traders farokht karne wale traders ko adaiygi karte hain; agar ye negative ho, to farikht karne wale traders khareedari karne wale traders ko adaiygi karte hain. Market ke halaat ke mutabiq, aap position hold karne ke doran ye adaiygian ada kar sakte ya mosool kar sakte hain.
Agar qeemat meri position ke baraks ho jaye to kia ho ga?
Agar nuqsanat ki waja se aap ka margin matlooba maintenance level se kam ho jata hai, to aap ki position foced liquidation ke zariye khud kaar tor par band ho skti hai. Stop loss orders aur ehtiyati position size istemal karne se is khatre ko kam karne mein madad mil sakti hai.
Ikhtitami Khayalat
Binance Futures mein XAUUSDT aur XAGUSDT contracts riwayati commodity markets aur crypto space jorne mein madad karte hain. Sarmaye aur trading ke auqat se mutaliq rukawatein khatam hone ke baad, sarmaya kaaron ke paas ab gold aur silver markets ka exposure hasil karne ka aasan tareeqa mojood hai. Is doran, sarmaya kaaron ko mutaliq khatrat ko bhi zehan mein rakhna chahiye kiun keh in mein leverage aur volatility ka bhi kirdar mojood hai.
Mazeed Mutala
Disclaimer: Yeh content aap ke liye "jesa hai" ki bunyad par sirf amoomi maloomat aur taleemi maqasid ki gharz se paish kiya gaya hai, aur is main kisi qisam ki numaindagi ya zamanat shamil nahi hai. Isse mali, qanooni ya deegar qisam ki professional advice nahi samjha jana chahiye, na he iss ka maqsad kisi makhsus product ya service ki khareedari ki tajweez dena hai. Aap ko chahiye keh zati mashware ke liye muta'alqa professional advisors se mashwara lein. Jahan ye content kisi third party contributor ki janib se paish kiya gaya hai, barah e karam note karein keh wo khayalat uss third party contributor ke hain, aur zaroori nahi keh wo Binance Academy ke khayalat ki akasi karein. Digital asset ki qeematein gher mustehkam ho sakti hain. Aap ki sarmaya kari ki value kam ya ziada ho sakti hai aur ho sakta hai ke aap ko apni sarmaya kari main istemal ki gayi raqam wapis na milay. Aap ki saramaya kari ke faislon ki mukammal zimedari aap par hai aur Binance Academy aap ko hone wale kisi bhi qisam ke nuqsanat ke liye zimedar nahi hai. Mazeed maloomat ke liye, hamari Istemal ki Sharait,Khatray ka Intibah aur Binance Academy ki Sharait mulahiza karein.