Ano ang Ethereum Name Service (ENS)?
Talaan ng mga Nilalaman
Panimula
Ano ang Ethereum Name Service?
Paano gumagana ang Ethereum Name Service?
Ano ang magagawa mo sa ENS?
Paano kumuha ng sarili mong ENS?
Magkano kumuha ng ENS domain?
Paano i-claim ang airdrop ng Ethereum Name Service?
Mga pangwakas na pananaw
Ano ang Ethereum Name Service (ENS)?
HomeMga Artikulo
Ano ang Ethereum Name Service (ENS)?

Ano ang Ethereum Name Service (ENS)?

Baguhan
Published Nov 25, 2021Updated Jan 18, 2022
6m

TL;DR

Ang Ethereum Name Service (ENS) ay isang serbisyo sa pagpapangalan para sa mga address ng wallet, hash, at iba pang identifier na nababasa ng machine. Ginagawa nitong mga madaling basahing address ang mga mahirap basahing string. Gumagana ito katulad ng Domain Name System (DNS) na ginagamit para sa mga website.

Noong umpisa, nag-auction ang ENS ng mga sikat na domain name na may anim, lima, apat, at tatlong titik sa mga interesadong user gamit ang format ng Vickrey auction. May .eth sa dulo ang bawat pangalan at puwede itong ikabit sa maraming address ng cryptocurrency, hash, at iba pang impormasyon.

Madali ka na ngayong makakabili ng mga pangalan nang walang auction at makakapagrenta ng mga ito nang taunan. Nakadepende ang mga presyo sa haba ng pangalang gusto mong rentahan. Gayundin, kung nagmay-ari ka ng ENS domain noong Oktubre 31, 2021, kwalipikado ka sa airdrop ng mga $ENS governance token. Puwede mong kolektahin ang mga iyon hanggang Mayo 4, 2021.


Panimula

Isa sa pinakamalalaking hamon ng blockchain ay ang gawin itong mas madaling gamitin at accessible. Kung titingnan natin ang mga pagbabayad gamit ang Ethereum (ETH) o Bitcoin (BTC), hindi praktikal at nakakalito ang mahahabang address ng wallet para sa mga bagong user, at kahit para sa sanay nang user. Simpleng basahin ang mga hexadecimal na string ng mga numero para sa mga computer pero hindi ito masyadong madali para sa mga taong user. Nilulutas ng Ethereum Name Service (ENS) ang problema sa pamamagitan ng pagbibigay-daan sa kahit sino na gumawa ng mga simpleng address na istilong pang-website na mas madaling tandaan at gamitin.


Ano ang Ethereum Name Service?

Ang Ethereum Name Service (ENS) ay isang proyektong nakabase sa Ethereum na inilunsad noong Mayo 4, 2017, nina Alex Van de Sande at Nick Johnson mula sa Ethereum Foundation. Nagbibigay-daan ang proyektong ito sa mga user na magpakita ng mahahabang pampublikong address ng Ethereum sa pinasimpleng paraan na gumagamit ng text. Pinapadali nitong ibahagi, gamitin, at tandaan ang mga address at iba pang data. Ang pagbago sa mga numerong nababasa ng machine gaya ng 0xAb5801a7D398351b8bE11C439e05C5B3259aeC9B para maging mga alternatibong nababasa ng tao ay mahalagang bahagi ng pagpapalaganap ng paggamit sa blockchain.
Hindi lang din sa mga address ng wallet limitado ang ENS. Magagamit ito para kumatawan sa mga ID ng transaksyon, hash, at metadata, na lahat ay karaniwang nakikita sa mundo ng cryptocurrency. Baka pamilyar ka na sa Domain Name System (DNS), isang sistema ng pagpapangalan na gumagana nang parang phonebook ng internet. Sa DNS, ang mga mahirap tandaang IP address ay ikinakabit sa madaling gamiting URL gaya ng https://academy.binance.com. Gumagana ang ENS nang parang DNS ng blockchain ng Ethereum.
Nakapaglunsad na ng governance token ang ENS bilang bahagi ng pagbabago nito para maging decentralized autonomous organization (DAO). Dahil sa malaking pagtaas ng presyo ng token, nagsimula nang mag-trending ang proyekto at marami nang nagkainteres dito.


Paano gumagana ang Ethereum Name Service?

Ang isang domain name sa ENS ay gumagamit ng mga ERC-721 Non-Fungible Token (NFT) para kumatawan sa natatanging address. Puwede kang mag-trade ng domain sa pamamagitan ng paglilipat o pagbebenta ng NFT sa ibang tao. Nakalakip sa bawat token ang mga address ng wallet at iba pang impormasyon, na mapapamahalaan ng may-ari. Ang isang top-level domain gaya ng .eth ay pagmamay-ari ng isang smart contract na tinatawag na registrar na nagkokontrol sa paggawa ng mga subdomain. Kung gusto mong gawin ang BinanceAcademy.eth, kakailaganin mong makipag-interact sa .eth registrar.
Para bumili ng domain name sa Ethereum, puwede mong tingnan ang availability nito at rentahan ito nang taunan. Gayunpaman, ino-auction dati ang mga sikat na pangalan. Magagawa ng pinakamataas na bidder na nanalo ng domain na i-attach ang mga address, gumawa ng mga sub-domain, at ipahiram o ibenta ang domain name niya. Halimbawa, kung pagmamay-ari mo ang BinanceAcademy.eth, puwede mo ring gawin ang learn.BinanceAcademy.eth nang libre.


Ano ang magagawa mo sa ENS?

Kung nalito ka na sa maraming address kapag nagpapadala ka ng mga cryptocurrency, maiintindihan mo kung bakit kailangan ang ENS. Gaya ng pag-save mo ng numero ng telepono ng pangalan ng isang kaibigan sa ilalim ng pangalan niya, sa ENS, nagiging mga madaling tandaang salita ang mahahabang numero. Gumagawa ito ng mas diretsahang karanasan na may mas maliit na tsansang magkamali.

Ang may-ari ng isang ENS ay puwede ring gumawa ng mga subdomain kung saan siya puwedeng magtalaga ng iba pang data. Hindi rin kailangang lagi itong isang address ng wallet. Puwede mo itong gamitin para tumuro sa isang smart contract, transaksyon, o metadata.


Paano kumuha ng sarili mong ENS?

Sa kasalukuyan, ang pagkuha ng ENS name ay kasingsimple ng pagtingin kung available ito sa https://app.ens.domains/ at pagrerehistro nito. Tingnan natin ang isang halimbawa kung paano simulan ang proseso. Una, pumunta sa https://app.ens.domains/, ikonekta ang iyong wallet at i-type ang domain kung saan ka interesado.


Makikita mo na ang availability ng napili mong pangalan. Sa sitwasyon natin, puwedeng irehistro ang BinanceAcademy.


Kapag nag-click ka sa pangalan, may makikita kang mga tagubilin kung paano irehistro ang ENS domain. Mapipili mo ang tagal ng pagrerehistro at makakakita ka rin ng pagtatantya kung magkano ang bayarin. Kapag may ether (ETH) ka sa iyong wallet, puwede mong sundin ang tatlong hakbang na ipinapakita at hilinging irehistro ang address.


Noong bago pa lang ang ENS, ino-auction ang mga sikat na pangalang may anim, lima, apat, at tatlong titik sa mga auction na nasa istilong Vickrey. Isinagawa ng isang smart contract ang buong proseso nang mahigit sa limang araw. Puwedeng sumali ang kahit sino sa isang pampublikong auction at puwede niyang subukang bilhin ang parehong domain name. Magpapadala ang bawat interesadong partido ng transaksyong naglalaman ng maximum na bid nila sa unang tatlong araw ng bukas na auction.

Pagkatapos, papasok ang auction sa yugto ng paglalahad. Ihahayag ng lahat ang kanilang bid o mawawala sa kanila ang na-lock nilang ETH, at magbabayad ang nanalong bidder ng halagang katumbas ng pangalawang pinakamataas na bid. Pagkatapos, makakatanggap ng refund ang lahat ng inihayag na bid.


Magkano kumuha ng ENS domain?

May dalawang posibleng bahagi ang gastos sa isang ENS domain: ang gastusin sa auction at gastusin sa pagrenta. Nakadepende sa kasikatan ng pangalan ang presyo ng isang ENS domain name sa isang auction. Naging mas mataas ang presyo ng mga nakikilalang pangalan gaya ng God, Car, o ETH, at karaniwang ang maiikling salitang may tatlong titik ang pinakamahal. Makakakita ka ng mga halimbawa sa ibaba ng ilan sa mga presyong binayaran para sa mga domain name.


Kapag nagmamay-ari ka na ng ENS domain, kakailanganin mong magbayad ng taunang gastos sa pag-renew na dapat bayaran gamit ang ETH. Nakasaad sa dolyar ang bayarin pero kino-convert ang mga ito gamit ang rate ng palitan na ibinibigay ng Chainlink ETH/USD oracle. Ang taunang gastos sa pag-renew ay $5 kada taon para sa mga pangalang may limang character o higit pa pero nagiging mas mahal ito kapag mas kaunti ang mga titik mo.


Paano i-claim ang airdrop ng Ethereum Name Service?

Sinumang may address na .eth sa isang snapshot noong Oktubre 31, 2021, ay kwalipikadong makatanggap ng mga $ENS token. Puwede mong i-claim ang mga iyon sa ilang simpleng hakbang. Puwede mong i-claim ang iyong mga token hanggang Mayo 4, 2022, bago i-burn ang mga ito.

1. Una, pumunta sa ENS Airdrop at ikonekta ang iyong wallet gamit ang button na [Kumonekta] o [Magkonekta ng wallet].


2. Piliin ang wallet kung saan mo gustong kumonekta, gaya ng MetaMask, WalletConnect, o iba pang provider.


3. I-click ang [Magsimula] para magpatuloy.


4. Makikita mo na ngayon ang opsyong [Simulan ang proseso ng pag-claim mo] kasama ng halagang kwalipikado mong matanggap.

5. Siguraduhing basahin ang impormasyong nagbibigay-kaalaman tungkol sa $ENS, pagkatapos ay ang Konstitusyon, na kakailanganin mong pirmahan gamit ang iyong wallet.

6. Ngayon, mapipili mong italaga sa iyo o sa ibang user ang kapangyarihan sa pagboto ng mga token mo.

7. Bilang pangwakas, suriin ang halagang kine-claim mo at ang itinalaga mo bago mo i-click ang [I-claim] at bago ka magbigay ng bayad sa gas para ma-unlock ang iyong mga token.


Mga pangwakas na pananaw

Sa mundo ng mga desentralisadong network, ang ENS ay isang hakbang tungo sa paggawa ng mga madaling i-access na paraan para makipag-interact sa isang blockchain. Tulad na lang ng paghinto natin sa paggamit ng mga IP address para mag-navigate sa web, puwede tayong makakita ng pagdami ng mga ENS name dahil kapaki-pakinabang ito at patuloy itong sumisikat. Mula noong airdrop nito, dumami rin ang nagkainteres sa ecosystem ng cryptocurrency sa proyekto.

Explore all of of our content